Weqfa Heskerdoğanê Pêygamberî, teqwîmê serrê 2026î yê bernameyanê Mewlidê Nebî ke her serre bi tewrbîyayîşê se hınzar kesî vırazîyenê, eşkere kerd. Goreyê nê teqwîmî, bernameyê Amedî do 19ê Nîsane roja Yeşembe, qezayê Baglarî de Meydanê Mîtîngî yê Parkê Newrozî de bêro vıraştene.
Seba eşkerayîya bernameyî, Serokê Komîteya Tertîpkari ya Mewlidê Nebî yê 2026î İbrahim Yaz, bînaya Temsîlkarîya Huzurevlerî ya Weqfa Heskerdoğanê Pêygamberî de rojnamegeran reyde amê têyê û vat ke ê serra 2006î ra nata bi nîzamî programanê Mewlidê Nebî vırazenê.
Yazi ard ziwan ke ê emser zî wazenê bi eynî coş û tewrbîyayîşî programî vırazê û wina va: ‘2006î ra nata, qasê 20 serran o ke ma her serre seba veladetê pîroz ê Pêygamberî (s.a.w) bi nîzamî çalakîyanê Mewlidê Nebî vırazenê. Her serre bi coş û hesretê de pîlî pawîyeno. Bitaybetî wexto ke vanê «Mewlidê Nebî», merdimî zaf heyecan benê. Ma zî seba nê rojanê fîrazan amadakarîyanê xo dest pêkerd.’
"Ma bi temaya ‘Pêygamberê Wahdet û Xelasiye Hezeratê Mihemed’ 19ê Nîsane de Meydanê Mîtîngî yê Parkê Newrozî de yê.”
Yazî diyar kerd ke temaya nê serrî ‘Pêygamberê Wahdet û Xelasiye Hezeratê Mihemed (s.a.w)’ o û wina va: “Ma her serre seba ke Pêygamberî (s.a.w) bışınasnerê, temayê dıme-dıme (cıya) şuxulnenê. Emser zî temaya ma ya bingehîne ‘Pêygamberê Wahdet û Xelasiye Hezeratê Mihemed (s.a.w)’ o. Sebebi ke ma nê serrî nê temayî ser o vınderenê, o yo ke ma wextê de winasî de yê ke wahdetî rê zaf hewcîyê ma esto. Rojê winasî de yê ke dijmenê Îslami û emperyalîstî bi hawayê de giran hêrişê Musulmanan kenê; coğrafyaya Îslami mîyanê deryayê goşî de ya; Xeze de, Yemen de, Îran de û heta her cayê dinya de Musulmanî binê zulm, wehşet û qirkirtene de yê.
Coka, seba fehmkerdena Pêygamberî (s.a.w) hewcîyê ma bi wahdetî esto. Wahdet, bi yewbîyayîşê Musulmanan û vera dijmenanê Îslami de pîya weriştene beno. Meqsedê ma yê xelasiye zî eşkera yo; wexto ke ma xwe bi metodê nebewî yê Pêygamberî bigirê û ey seba xo bıkirê rehber, o çax xelasiye resena ma. Xelasiye, pêgirewtena Quran û sunetî ya ke Pêygamberî ma rê emanet kerdo. Ma zî seba ke vajê rayîrê xelasiye tenya pê kerdışê heyatê Pêygamberî (s.a.w) û rayîrê ey ra şîyayîş de yo, emser temaya xo nê ser o awan kerde.
Yazî va ke emser bernameyê Amedî do 19ê Nîsane roja Yeşembe bêro vıraştene û wina domna: ‘Wextê de winasî de ke hewcîyê ma bi wahdetî esto, seba ke ma diyar bıkerê rayîrê xelasiye tenya rayîrê Efendîyê ma (s.a.w) o, înşallah 19ê Nîsane roja Yeşembe Meydanê Mîtîngî yê Parkê Newrozî de ma do bi heme şarê xo de bêrê têyê. Ma do Efendîyê xo yad bıkerê û bıfînerê ma ke mesajê ey bıreşnerê însanan.’
“Seba ke bernameyê ma bêkêmasî (bêsorun) bêro vıraştene, ma her war de amadakarîyanê xo dest pêkerd.”
Yazî diyar kerd ke ê seba amadakarîyanê bernameyî meqamanê munasîban reyde zî qisey kerdê û wina va: “Ma amadakarîyanê xo dest pêkerd elhedulîllah. Seba ke bernameyê ma bêsorun bêro vıraştene û mêmanê ke yenê rehet bıkerê, ma her war de dest bi xebatan kerd. Şıma zî zanê ke bernameyê ma bernameyê de pîl o. Seba ke nê bernameyî de ke do se hınzar kesî tede bêrê têyê ma sorun nêvînerê, ma xebatanê xo dest pêkerd. Ma dılekçeyê xo dayê meqamanê eleqedaran. Seba ke hewcîyê binanî (altyapı) yê meydanî bênê ca, ma şaredarî (belediye) rê zî muracaatê xo yê resmîyî kerdê. Nıka seba heme xebatan ma «start» da. Ancî seba ke şarê ma hîna rehet bışîyo meydan, ma şaredarî ra otobusî zî teleb kerdî. Ma bawer kenê ke dılekçeyanê ma rê do demê de kilm de bi hawayê de pozîtîf cewab bêro. Coka, înşallah ma do bernameyê xo bi hawayê de tewr rind vırazê.”
“Seba vatenê quwetê Musulmanan û seba ke ma bi yew vengi qîr bıkerê, ma heme birayanê xo pawenê bernameyê xo.”
Yazî peynî de heme hemwelatîyî dawetê bernameyî kerdî û wina va:
“Şıma zî zanê ke Pêygamber (s.a.v) Pêygamberê heme ummetî yo. Coka ma zey Weqfa Heskerdoğanê Pêygamberî, her serre bajaranê cîya-cîyan ê welatê xo de nê bernaman vırazenê. Bi xisusî seba heme şarê Amedî û bi umûmî seba heme şarê Turkîya dewa ma o yo ke: Seba ke ma nê eşkê pîrozî û nê heyecanî pîya bıcıywê, ma zey her serre ancî şıma meydanan de pawenê. Bi nê wesîle ma wazenê ke quwetê Musulmanan û yewvengîya (yewbîyayîş) înan vera zaliman û dijmenanê Îslami de nîşan bıdê; coka ma heme birayanê xo pawenê bernameyê xo. Ma do zey her serre heme dezgeyanê sivîlan (STK) û temsîlkaranê partîyanê siyasîyan rê zî dawetîye bırêşnê. Pêygamber (s.a.v) qîmet û xala ma ya hempar a. Ma nê xalî ser o heme birayanê xo dawetê bernameyê xo kenê.”