Diyarbekir de, mabênê tarixonê 21-25ê Nisana 2026ine de, qezay Yenişeheri de Merkezê Fuarê Mezopotamya de 17. Fuarê Tarım, Heyvancılığ, Kergetıcılığ, Endüstriyê Şıti u Veterineriye, vıstane ra nata meymonê xo qebul keno.
Fuarê ke tede sektorê tarım u heyvancılığı rê teknolojiy u malê heray sernişon benê, sukonê binon ra tamê mehalliyi zî ameyê verê çımonê şarê Diyarbekiri. Hemvatanê ma, nê fuar de eşkenê malonê her mıntıkayê Tırkiya yew ca de bıvênê.
Esnafo ke fuar de stant akerdo, hem malonê xo danê naskerdene hem zî şarê Diyarbekiri dawetê fuari kenê.
"Ma Diyarbekir zaf hes kenime, aye ra malonê xo yê tewr baştıron anîme naca"
Mustafa Usanyılmazo ke Kahramanmaraş ra ameyo fuar, heskerdışê xo yê seba Diyarbekir wina va: "Ez Diyarbekir u şarê Diyarbekiri zaf hes keno. Ma pîya gureyê pêro hemvatanon fuar de pawenime. Ma Maraş ra dondurmaya Maraşê ya sade anîye. Dondurmaya ma şıt, şeker u salep ra vırazîyena. Şıto ke ma tede şoxulnenime zî, Kahramanmaraş de şıto xozayi u organiko ke bizon ra yeno gırewtene o."
Hasan Başkano ke Aydın ra ameyo fuar zî va ke ma zaf her tim yenime Diyarbekir: "Fuara ma newe dest pêkerd. Ma suke u qezon ra her kesi pawenime. Stantê ma de xurme, zeytun, pelê mewe u roonê zeytuni yo ke xelat gırewto, ma pêşkêşê şari kenime. Ma Diyarbekir zaf hes kenime, aye ra malonê xo yê tewr baştıron (kaliteliyon) anîme naca."
"Ma seba ke malonê xo şarê Diyarbekiri rê bımosnime (bıdime naskerdene) naca de yime"
Elif Aydına ke Afyon ra ameya, va ke stantê aye de malê herayi estê: "Lokumê ma yê bi qeymax, bi çikolata u bi gula estê. Nêy ra qeyre, ma tahin, dıps u malonê hişkon zî meymonon rê pêşkêş kenime."
Kadir Erdemo ke İzmir ra ameyo, va ke ma her tim yenime fuaronê Diyarbekiri: "Ewro zî ma seba ke malonê xo şarê Diyarbekiri rê bımosnime naca de yime. Stantê ma de fekhişkok (kuruyemiş), meyveyê hişki, çerez u xurme estê. Malonê ma kalitê yewine u taze yê. Reyna, seba ke hemvatanê ma bışênê bışerînê, ma bi fiyatonê munasibon roşenime."
Şaban Zireko ke seba naskerdena hıngomê (mıngomê) xo Hakkari ra ameyo, wina va: "Mı hıngomê Hakkari ard. Ez hem seba malê xo hem zî seba naskerdena memleketê xo naca de yo. 18 serrî yo ez yenno Diyarbekir, serre de tewr kêmî di rey naca de beno. Hıngomê ma yo orjinal u tahinê ma estê. Ma hıngomê xo, dewa mı Dewa Ceylanlı ya Hakkari de ke rakmê aye 2 bin u 600 o, tede vırazenime."
Fuar, heta 25ê Nisana meymononê xo qebul keno.