Bazarê semtanê Diyarbekirî de hefteyê peyênî de fîyatê meyveyan %30 (se ra hîris) bîyê zêde; nê zî hem fîrotîşê esnafî %70 (se ra hewtay) kerd kemi, hem zî quwetê herînayîşê şarî kerd nizm.
Esnafê bazarî vanî ke, muşterîyê ke verê coy dezgehanê meyveye ra 5 kîlo mal herînayêne, nika şert u şîrtanê ewroyî de ancax kîloyak herînî; nê semed ra fîrotîşê kîloyan nika kewto kîloyanê nîmçe u graman. Esnafê bazarî diyar kerd ke nizmîya quwetê herînayîşê muşterîyan înan zî xirab tesîr kena; verê coy bi tonan mal herînayêne, nika ancax 250-300 kîlo herînî u naye fîrotîş de zî zehmetî ancenî.
"Masrafê ma estê u ma nê masrafan nêşênî pîya bıkirî"
Mehmet Kaya, ke esnafê bazarê semtî yê Diyarbekirî yo, va: "Dezgehê mı de moz, çîlek, çaxle, kîvî, armute, saye u mandalîna estê. Fîyatî normal ê la ewro mal şenık o, aye ra hîre paha yo. Normal de mozo ke 60-70 TL bi, ewro 90 TL yo; çîleko ke 80-100 TL bi, ewro 120 TL yo. Armute meyveyanê bînan ra gore mınasib o, kîvî zî erjan o la seba hîrîya heyatî, şar de quwetê herînayîşî çînyo."
İbrahim Tayarî zî bal ant nızmîya quwetê herînayîşî ser u va: "Fîyatê ma normal ê la quwetê herînayîşî çînyo. Mesela, kesê ke verê coy 5 kîlo herînayêne, nika kîloyak herînî; yê ke kîloyak herînayêne zî nika nîm kîlo herînî. Yanê nika herînayîş kîloyan ra kewto 500 graman. Verê coy meyveyê ke ma yew ton yan zî 700 kîlo rotêne, nika daxılê 250-300 kîloyan bîyê. Masrafê ma zî estê u ma nêşênî nê masrafan pîya bıkirî. Ma her malî ser o 15-20 TL karê xo nêgırejî, masrafê ma dernêkuno. 500-600 TL pereyê naklîye yo, gurekerê (elemanê) ke ma şuxulnî ra zî ma hezar TL danî. Bi raştî ma nika nêşênî eleman zî bışuxulnî, ma bi xo xebetîyênî. Şar de ke quwetê herînayîşî nızm bîyo, nê zî ma ser o vılabîyo."
"Maliyeten ra tewr verî mazot yeno"
Tezgehtar Sadullahî va ke berzbîyayîşê fîyatan semedê zêdebîyayîşê maliyetan o: "Fîyatê meyveyan berz ê. Sebebê naye zî her roje petrole, zêre u dolarî rê zam ameyîş o. Maliyetî zaf ê. Mal baxçe de erjan o. Baxçe de portakala ke 40 TL ya, heta ke resena tîya bena 60 TL."
Mehdi Demirî zî wina va: "Dezgehê mı de meyve u zerzewat estê. Zerzewat paha yo la meyveyî normal ê. Maliyeten ra tewr verî mazot yeno. Mazot ke berz bîyo, naklîye u kirayî zî berz bîyê."