Serokê Dewleta Emrîkayê Donald Trump, piştî gengeşîya ku bi Serokê Dewleta Ukraynayê Volodîmîr Zelenskîy re kir, hemû alîkarîyên leşkerî yên ku ji Ukraynayê re tê kirin rawestand.
Hat destnîşankirin ku ev biryar piştî gengeşîya ku roja Înê li Qesra Spî pêk hatibû hatîye girtin.
Herdu serok jî di berîya peymana madenên biqîmet de ketin qirika hev û dûre Zelenskî ji Emrîkayê vegerîya.
Rayedarên Qesra Spî, rast kirin ku Trump hemû alîkarîyên leşkerî yên ku ji Ukraynayê re têne kirin ji bo demekî bêdem daye rawestandin.
Rayedarekî ku ji CNNê re axivî weha got, “Serok bi zelalî îfade kiribû ku ew hemû hişê xwe dabûn aştîyê. Em dixwazin ku bila hevparên me jî hemû hişên xwe bidin vê hedefê. Ji bona ku em baş emîn bibin ku ew ji çareserîyê re destekê didin an jî na em hemû alîkarîyên xwe didin sekinandin.”
Rayedarekî dinê jî destnîşan kir ku ev biryar, tenê çek û cebilxaneyên ku hêna negihiştine Ukraynayê di nav xwe de dihewîne.
Welatên Ewrûpayê, daxuyandibûn ku ew ê piştgirîyên xwe yên ji Ukraynayê re bidomînin.
Zelenskîyê ku ji Emrîkayê vegerîyabû, çûbû Îngilistanê û bi serokên Ewrûpayê re hatibû cem hev. Serokwezîrê Îngilistanê Keir Starmer, di Lûtkeya ku derheqê Ukraynayê de li Londonê hatibû tertîpkirin de daxuyandibû ku ew ê alîkarîyên leşkerî berdewam bikin û wê astengîyên aborî yên li ser Rûsyayê jî bê zêdekirin. (ÎLKHA)