Li gorî agahiyên hatine bidestxistin, Metin Ö. (37) duh li nêzî gundê Kadellî yê ser bi navçeya Tarsûsê ve, di qasab û xwaringehekê de (ku beriya salekê li wir dixebitî) bi demançeyê gule reşandin. Di êrîşê de xebatkar Ahmet Ercan û xwediyê kargehê Sabri Pan jiyana xwe ji dest dan. Gumanbarê ku bi otomobileke spî ya xwedî plaqeya 01 B 9171 ji cihê bûyerê reviya, li benzînxaneyeke li gundê Yenîkoyê şofêrê tîrê Gökay Selfioğlu jî bi çekê kuşt. Gumanbarê ku revê berdewam kir, li gundê Darîpinarî yê navçeya Çamliyaylayê hevjîna xwe ya berê Arzu Özden bi çekê kuşt. Hat diyarkirin ku piştî vê, wî li gundê Yenîkoyê Abdullah Koca jî bi motorsîkleta wî ve avêtiye şarampolê û bûye sedema mirina wî.
Hate hînbûn ku gumanbar li gundê Karakûtûkê şivanekî bi navê Yusuf Oktay jî kuştiye.
Hat ragihandin ku di dema êrîşan de li ser xeta revê 8 kes jî birîndar bûne. Birîndar bi ambûlansan rakirin Nexweşxaneya Dewletê ya Tarsûsê û nexweşxaneyên derdorê.
Piştî bûyeran, ji bo girtina zanbar (gumanbar) gelek tîmên jandarmeyê sewqî herêmê hatin kirin. Tîmên ku şopa gumanbarê ku dihat texmînkirin reviyaye devera daristanî dişopandin, li herêma Çokakê ya li ser gundê Karakûtûkê operasyon birin ser malekê.
Hat diyarkirin ku zanbarê ku di dema operasyonê de fêm kir dê were girtin, bi çeka li gel xwe intihar kiriye.