Sekreterê Giştî yê Neteweyên Yekbûyî Antonio Guterres karesata ku li Xezzeyê diqewime wekî "krîzek exlaqî ku wijdanê cîhanî dixe ber pirsê" bi nav kir.
Guterres bi rêya vîdyoyekê li civîna giştî ya Rêxistina Efûyê ya Navneteweyî li Pragê axivî û bi tundî rexne li pasîfbûna civaka navneteweyî kir û got, "Peyv nikarin zarokên birçî têr bikin."
Guterres ragihand ku karmendên NY li Xezzeyê birçî ne, gelek ji wan dibêjin ku "êdî xwe sax an mirî hîs nakin", û tekez kir ku rewşa li herêmê ji her tiştî wêdetir xirab bûye.
Guterres diyar kir ku zarokên li Xezzeyê, ji ber birçîbûnê, niha dibêjin ku "dixwazin biçin bihuştê ji ber ku qet nebe li wir xwarin heye."
Guterres diyar kir ku "Neteweyên Yekbûyî dê di her fersendê de dengê xwe bilind bike, lê axaftin dê zarokan têr neke," û got ku ji 27ê Gulana 2025an vir ve, zêdetirî hezar Filistînî hatine tomar kirin ku dema li xwarinê digeriyan hatine kuştin. Wî tekez kir ku ev sivîl ne di şer de lê di birçîbûnê de mirine.
Guterres diyar kir ku divê agirbestek daîmî û bê şert û merc were pêkanîn, divê hemî rehîne werin berdan, û divê gihîştina mirovî ya bê asteng bo Xezzeyê bê pêkanîn. Wî her wiha banga xwe ji bo "gavên bêveger, berbiçav û lezgîn" ber bi çareseriyek du dewletan ve dubare kir.
Wî her wiha diyar kir ku Neteweyên Yekbûyî amade ye ku alîkariya mirovî li Xezzeyê bi lez û bez berfireh bike ger agirbest were ragihandin.
Dengê Xana Axpar