Tevgera berxwedana Îslamî Hamasê hişyarî da ku felaketake însanî jiyana bi sed hezaran Filistîniyên koçberbûyî yên li Şerîda Xezzeyê tehdît dike. Barana dijwar kampên penaberan veguherandiye zozanên heriyê, û konên hilweşiyayî yên ku nikarin li hember baran û germahiya sermayê bisekinin, di bin avê de mane.
Di daxuyaniyek çapemeniyê de, tevgerê diyar kir ku wêneyên konên hilweşiyayî, betaniyên di bin avê de û bi hezaran malbatên ku li qadên vekirî koçber bûne rastiya dijwar a dorpêça dagirkeriyê ya berdewam nîşan dide û hêzên îşxalker bi tevahî berpirsiyarê êşa mirovî ya ku niştecihên herêmê dijîn nîşan da.
Hamas bûyeran wekî "karesatek ji aliyê dagirkeriya siyonîst a sûcdar ve hatiye afirandin" bi nav kir û hişyarî da ku her derengketina destwerdana navneteweyî dê bibe sedema zêdebûna trajediyê û ketina merhaleyek talûketir, ku dikare bibe sedema qurbanî û trajediyên bêtir.
Tevgerê tekez kir ku bi hezaran malbatên Filistînî bêmal û bê stargeh mane da ku ji sermayê biparêzin, ji pêdiviyên herî bingehîn ên jiyanê bêpar in, û destnîşan kir ku astengkirina berdewam a dagirkeriyê ya ketina kelûpelên alîkariyê, kon û karavanan belavbûna êşê zêde dike û her kesî dixe xetereya mirinê.
Hemasê bang li Neteweyên Yekbûyî, Yekîtiya Ereban û Rêxistina Hevkariya Îslamî, ku garantorên peymana agirbestê ne, kir ku ji bo gihandina pêdiviyên mirovî, bijîşkî û stargehê bo Şerîda Xezzeyê bi lez tevbigerin. Tevgerê tekez kir ku pêwîst e piştgirî were zêdekirin da ku parastina Filistîniyên koçberbûyî were misogerkirin û asta herî kêm a berxwedanê ji wan re were peyda kirin.
Berdevkê Parastina Sivîl a Xezzeyê Mehmûd Besal di daxuyaniyek çapemeniyê de piştrast kir ku barana zêde ya di saetên serê sibê de gelek stargeh di bin avê de hiştin û bi hezaran kon bi giranî zirar dîtin. Besal tekez kir ku ajans ji ber nebûna alavên pêwîst nekariye operasyonên rizgarkirinê bike an jî bi lehiyê re mijûl bibe, piştî ku îşxalkeran hemî alavên pêwîst ji bo mijûlbûna bi bûyerên weha re hilweşandin.
Ji 7ê Cotmeha 2023an vir ve, rejîma îşxalker a sîyonîst bi piştgiriya Emrîka û Ewropayê, êrîşên xwe yên qirkirinê, kuştin, birçîbûn, wêranî û koçberkirinê, zêde dike û bangewaziyên navneteweyî û fermanên Dadgeha Navneteweyî ya Edaletê ji bo rawestandina van îxlalkirinan paşguh dike.
Ji ber êrîşên berdewam, zêdetirî 239 hezar Filistînî, tevî zarok û jinan, şehîd û birîndar bûne û zêdetirî 11 hezar kes jî winda bûne. Bi sed hezaran kes jî koçber bûne, birçîbûna berfireh bûye sedema mirina gelek zarokan û li gelek bajar û deverên Xezzeyê wêranîyeke berfireh çêbûye. (ÎLKHA)