Hereketa Ensarullah ragihand ku wan balafireke bêmirov a ji cureya MQ-9 (BB) ya artêşa Emerîkayê xistiye xwarê.
Berdevkê leşkerî yê Hereketa Ensarullahê Yehya Serî di daxuyaniya xwe ya li ser medyaya civakî da diyar kir ku êrîşên Emerîkayê yên li ser Yemenê dewam dikin û di êrîşên dawîn da jî sivîl dibin hedef.
Serî got, "Emerîka her tim Yemenê hedef digire û li hemberî gelê me qetlîamên giran pêk tîne. Di 10 rojên dawî de ev cara sêyemîn e ku MQ-9 bêmirov xistiye xwarê."
Berdevkê Serî diyar kir ku ji destpêka êrîşan heta niha bi tevahî 18 balafirên bêpîlot ên cureya MQ-9 xistine xwarê.
Herwiha Hereketa Ensarullahê ragihand ku di encama êrişa hewayî ya Amerîkayê li bajarê Hudeydeyê li rojavayê Yemenê 6 sivîl şehîd bûne û 16 kes jî birîndar bûne.
Hereketa Ensarullaha ku êrîşên xwe yên li dijî dagirkeran ji bo piştgiriya Xezzeyê didomîne, diyar kir ku heta êrîşên sîyonîstên îşxalker rawestin ew ê van operasyonan bidomînin. (ÎLKHA)