Malbatekên ku li bajaroka Sîserê (Balpınar) a ser bi navenda Êlihê û gundên Zorköy û Yeniköyê di sedî serayan de hilberînê dikin, dest bi yekemîn çinîna xiyaran a serdemê kirin.
Hilberînerên ku di saetên serê sibê yên zû de dikevin serayan, ew berhemên ku bi keda mezin xwedî kirine diçînin; bi vê hilberînê hem piştgiriya aboriya herêmê dikin hem jî aboriya (bûçeya) malbata xwe li piyan digirin.
Berhemên ku hatine çinîn di serî de ji bo bajarên herêmê û ji bo gelek deveran tên şandin; hilberîneran anîn ziman ku ew ji firotina berhemên xwe ya bi bihayê dilê xwe memnûn in.
Hilberînerên serayan di daxuyaniyên xwe yên ji bo nûçegihanê İLKHAyê de diyar kirin ku ew îsal hem ji berhemê hem jî ji bihayê memnûn in û gotin ku seracîtî çavkaniya sereke ya debara malbata wan e. Hilberînerên ku dan zanîn baranan hinekî bandor li hilberînê kiriye, anîn ziman ku serdem bi giştî baş derbas dibe.
Selim Önal
“Îsal hem ji çinînê hem jî ji bihayê memnûn in”
Hilberîner Selim Önal ê ku diyar kir ew di serayên xwe de xiyar û firingiyan hildiberînin, weha got: "Em li vir karê seracîtiyê dikin. Bi giştî şeş donim seraya me heye. Îsal me li du donimên wê xirtik çandibû, niha me di şûna wan de xiyar çandin. Li donimekê firingî, li çar doniman jî xiyaran xwedî dikin. Meh wextê din em ê berhemên heyî rakin û di şûna wan de berhemên nû biçînin; karên me bi vê awayî berdewam dikin. Niha em çinîna xiyaran dikin. Îro dermanreşandin jî hebû lê karê me yê sereke çinîna xiyaran e. Xiyarên ku em diçînin, em di saet 11.00-12.00an de dibin halê. Firotin piştî nîvro li ser halê tê kirin. Di serî de Wan, ji hemû herêmê mişterî tên û ji vir dikirin."
Önal ê ku anî ziman ew ji berhema yekemîn a serdemê memnûn in, weha peyivî: "Hezar şikir, berhem di asta normal de ye. Îsal hem ji çinînê hem jî ji bihayê memnûn in, me tu zehmetî nedît. Wekî par (sala borî) malê me neçû çopê. Anku dema em diçin halê, em dikarin heqê keda xwe bistînin; di vê mijarê de pirsgirêka me nîne, şikir ji Xwedê re. Lê belê em hîna nizanin dê di berhema duyemîn de çi bibe; niha ji berhema yekemîn pir memnûn in."
Aydın Tekin
“Seracîtî bû çavkaniya sereke ya debara me”
Hilberîner Aydın Tekin ê ku diyar kir nêzî çar-pênc salan e ew bi seracîtiyê re mijûl dibe, destnîşan kir ku wan bi şîreta zarokên xwe dest bi vê karî kiriye û weha got:
"Niha em bi seracîtiyê re mijûl dibin. Rastî, berê ez bi karên boyaxkirin û înşaatê re mijûl dibûm. Lê zarokan, bi taybetî jî kurê min got: 'Bavo, wer de em bi seracîtiyê re mijûl bibin, karê serayê baş e.' Me jî nêzî çar-pênc sal berê boyaxkarî berda û em berê xwe da vê karî; niha em bi awayekî aktîf seracîtiyê dikin. Bi taybetî em xiyar û firingiyan diçînin. Hinek hevalên me vê daxwazê bacanêreş jî diceribînin. Hemd ji Xwedê re, seracîtî niha bûye çavkaniya sereke ya debara me û em ji vê yekê zehf memnûn in."
“Hewaya baranî bandor li berhemê kir lê serdem bi giştî baş derbas bû”
Aydın Tekin ê ku diyar kir şert û mercên hewayê yên îsal hinekî bandor li hilberînê kiriye, weha got: "Çinîna xiyaran dest pê kir û niha em di nîvê serdemê de ne. Nêzî 15-20 rojên din serdema yekemîn a çinînê ku em jê re dibêjin 'serdema yekem' bi dawî dibe. Piştî wê, di seracîtiyê de em pêvajoya ku em jê re dibêjin 'şewitandin' yan jî 'jelatînkirin' bi kar tînin. Dema ku em axê bi vê awayî bi jelatînê dadipirsin, sera hema bêje xwe nû dike û dibe wekî cîhekî ku qet nehatiye çandin, terrûpaş dibe. Hezar şikir, ev kar ji bo me bûye nîmetekî mezin û çavkaniyeke xweş a debarê. Em mîna malbat bi vê karî re mijûl dibin."
Tekin ê ku anî ziman hewaya baranî di nav şînkayiyan de dibe sedema stresê, weha peyivî: "Îsal ji ber ku hewa bi giştî pir baranî derbas bû, hinekî zehmetî çêbûn. Ji ber ku germahiya hewayê bi berdewamî nebirêkûpêk bû, şînkayî jî dikeve stresê. Dema ku şînkayî dikeve stresê, mixabin berhem kêm dibe. Ji ber vê yekê, her çend ez nikaribim ji bo berhemê bibêjim 'pir baş e' jî, dîsa jî normal e; ez dikarim bibêjim ku me bi giştî serdemeke baş derbas kir."