Xebatên lêgerînê ji bo dîtina Nimet Kiliç, dayika du zarokan ku ji 21ê Çile ve li navçeya Çinar a Dîyarbekirê winda ye, bênavber berdewam dikin. Lêgerîn li qadeke fireh pêk tê û kûçikên şopîner û yên kadavrê, her wiha dron û helîkopterek tên bikaranîn.
Gelek ekîb beşdarî lêgerîna Nimet Kiliç a 45 salî ku di 21ê Çile de piştî ku ji mala xwe ya li taxa Kubacik a navçeya Çinarê derket winda bû dibin. Bi tevahî 303 personel ji Lêgerîn û Rizgarkirina Zanîngeha Dîcleyê (DÜAK), AFAD, komandoyên cendermeyan, Lêgerîn û Rizgarkirina Binê Avê ya Cendermeyan (SAK), Lêgerîn û Rizgarkirina Cendermeyan (JAK) û gelek saziyên din li deverên gundewarî û zozanên taxê xebatên lêgerîn û rizgarkirinê dimeşînin. (ÎLKHA)