Tireke alîkariya mirovî ku ji aliyê Karwana Hêviyê (Umut Kervanı) ya li Rihayê çalak e hatibû amadekirin, ji bo ku bigihîje bajarên Kobanî, Qamişlo û Hesekê hat birêkirin.
Hate diyarkirin ku di tira alîkariyê de, li gel pêdiviyên bingehîn ên wekî cil û berg, xwarin, daxurê (bebek bezi) û xwarina zarokan (mama), her wiha lîstokên ji bo zarokan jî cih digirin.
Koordînatorê Herêma 2yan ê Karwana Hêviyê (Umut Kervanı) Mehmet Faik Doğan, derbarê vê mijarê de ji mîkrofona ÎLKHAyê re axivî û weha got:
"Wekî Karwana Hêviyê, me li Rihayê tirek kelûpelên alîkariya mirovî ji bo herêma şer a Sûriyeyê, bi taybetî ji bo herêma Rojava, ango bajarê wekî Kobanî, Qamişlo û Hesekê amade kir. Di nav vê alîkariyê de xwarin heye, kelûpelên paqijiyê hene, betanî hene, cil û bergên zivistanê hene; ango gelek malzemeyên ku ji bo mirovahiyê wekî pêdivî tên dîtin hene. Wekî Karwana Hêviyê, înşallah me berê jî çend tir şandibûn, niha jî em vê tirê ji Rihayê bi rê dikin. Em spasiya hemû xêrxwazên xwe yên ku rasterast an nerasterast piştgirî û alîkarî dane dikin. Xwedê bibe yar û yaridêrê wan. Alîkariyên me yên ji bo Rojava înşallah berdewam bikin. Ev ne destpêk e û dê ne ya dawî be jî. Bi îzna Xwedê, bi vê şêweyê alîkariyên me dê ji her bajarê me û ji bajarên me yên din ên cihêreng bigihîjin cihê xwe înşallah."