Endamê Weqfa Kervanê Umutî, Komeleya Harîkarîya Însanî û Perwerde û Kulturî ya Kervanê Umudî yê Çoligî, raporê faliyetî yê menga Nîsana 2026î eşkere kerd.
Serekwekîl Selahattin Buruldayî derheqê xebatan de eşkerayîyêka nustekî daye û va: “Menga Nîsana 2026î de 76 keyeyan rê bi qîmetê 91 hizar û 200 TL goştê sor, 2 keyeyan rê bi qîmetê 9 hizar û 400 TL eşyayê keyeyî, 69 keyeyan rê bi qîmetê 79 hizar û 883 TL werd (erzak), 73 keyeyan rê bi qîmetê 185 hizar û 600 TL kinc (cil û berg) û 38 keyeyan rê zî bi qîmetê 148 hizar û 500 TL pereyê neqdî ameyê barekerdene. Pêro pîya 258 keyeyan rê bi qîmetê 514 hizar û 583 TL hetkarî ameye kerdene. Reyna, ser de teberê welatî û Filistin (Gazze) zî tede, bi temamî 1 mîlyon û 474 hizar û 233 TL hetkarîya aynî û neqdî ameye kerdene.”
“Kedê her xêrxwazê ma, keyeyêk de bi umut”
Buruldayî da zanayene ke qencî sey toximê ke hewt simerî dano o yo û wina va: “Ma huzurê berketê menga Remezanî ke ma rasta menga Nîsanî kerd, ciwîyenê. Menga ke ravîyar de, mahaleyanê merkezê Çoligî de ma destê xo resna sofreyan û zerrîya keyeyanê feqîran. Ma nîşan da ke wexto ke ma qencîye de yew bîy, ma çi şenê bîyarê ca. Kedê her xêrxwazê ma, keyeyêk de bi umut. Ma bi goştê sor, werd, kinc, eşyayê keyeyî û hetkarîya neqdî bîyî mêymanê keyeyan. Ma mabênê destê ke dano û destê ke geno de bîyî pird.
Allah (Celle celaluhu) wina buyur keno: 'Meselê înanê ke malê xo rayîrê Allahî de xerç kenê, sey toximêkê ke hewt simerî dano o yo. Her simerî de se hebî estê. Allah kê bixwazo ey rê qat bi qat zêde keno. Allah (keremê xo) hîra yo, o yo ke her çîyî zanayo.' (Sura Beqara, ayetê 261.) Rebê ma mizgînî dano ke her qencîya ma de ma rê qat bi qat bido. Ma zî sey Kervanê Umutî, heta ke destê ma ra bêro, ma do her tim paldê keyeyanê hewcedaran de bê.”
“Şima zî tede bibe karwanê qencîye”
Buruldayî xêrxwazan rê veng da ke paşpîl bidê xebatan û wina va: “Xêrxwazê ma yê qîymetdarî, ma sey Komeleya Kervanê Umutî yê Çoligî xebatanê xo yê Qurbanê 2026î rê va ‘Bismillah’. Ma zanenê ke nê welatî de û çar kofeyanê dunya de bi hezaran birayê ma estê ke bi muna (melûl) yenê roja eyde. Ma vejîyenê rayîr ke kurbananê şima, emanetanê şima, bê qasid rasterast berê nê birayanê ma de teslîm bikerê. Zereyê welatî de mahaleyanê Çoligê ma de, teberê welatî de zî heta Afrîka û Asya, nê rayîrê qencîye de şima benê rêberê ma? Xo vîra mekerê, yew hîseya ke şima danê, semedê keyeyêk bena eydeya ke serrêke xo vîra nêkenê. Werê de, nê eyde de ma bibê bereketi sofreyêk de, bibê huyayîşê rîyê sêwîyêk de. Yew hîseya kurbanî, şahîya eyde ya keyeyêk o. Kurban barekerden o. Kurban birayîn o. Nê eyde de zî ma do bibê huyayîşê sofreyan, bibê umudê zerrîyan. Ma sipasîya heme xêrxwaz û dildaranê xo kenê ke hetkarîya xo ma ra kêm nêkerde.”
“Bedelê kurbanî 20 hizar TL yo”
Buruldayî da zanayene ke sey Kervanê Umutî yê Çoligî ê semedê Eyda Qurbanî ya 2026î dest bi xebatan kerdê û wina va: “Eyda Qurbanî ya mibarek nêzdî bena û ma zî xebatanê xo da destpêkerdene. Bedelê kurbanê ma yê welatî 20 hizar TL yo. Reyna teberê welatî de zî Gazze, Afrîka, Asya û cayanê bînan de ma faliyetanê xo yê kurbanî ramenê. Her hetkarîya ke şima bikerê, do rîyê mazlûmêk de bibo huyayîş. Fiyatê kurbananê ma wina yê.