Li Diyarbekirê barana gur a ku ev sê roj in bê navber dibare, jiyanê dem bi dem sekinand û bû sedema lehî û herikîna avê. Barana ku bi taybetî li navçeyên Farqîn û Lîceyê bandora xwe zêde kir, rê li ber astengiyên di gihîştinê de, hilweşîna rêyan û zirara li piran vekir.
Li navçeya Farqînê, ji ber barana zêde li ser rêya koma gundên Boşatê hilweşîn pêk hat. Hat ragihandin ku di encama vê hilweşînê de rêya 11 gundan ji gihîştinê re hatiye girtin. Tîm ji bo çêkirina rêyan dest bi xebatan kirin, rayedaran jî welatî li hemberî rîskên nû hişyar kirin.
Li navçeya Lîceyê jî, barana ku ji duh êvarê ve bibandor e, bû sedema rabûna çeman. Li gundê Hezanê ku di navbera Lîce û Hazroyê de ye, ji ber lehiya çem di hin piran de xisar çêbû. Welatiyên ku mecbûr man wê rêyê bi kar bînin, bi baldarî di ser pirên xisarkirî re derbas bûn.
Li navçeya Lîceyê, komek welatiyên ku ji bo seredana goristanê çûbûn gundê Sêdeqnê, ji ber barana zêde asê man. Welatiyên ku serê sibê bi zehmetî gihîştibûn gund, piştî ku baranê bandora xwe zêde kir nekarîn vegerin. Ji ber ku pira gund bi rêya sereke ve girê dide û rêyên li ser wê wextê di bin ava lehiyê de man, hemû pêwendiya gundê Sêdeqnê bi navenda bajêr re qut bû. Welatiyên asêmayî diyar kirin ku gihîştin nemaye û ji ber berdewamiya baranê rewş xeternak e.
Li aliyê din, li ser rêya derdorê (çevre yolu) ya Diyarbekirê, li herêma Taxa Tellikayayê, Çemê Eğertutmazê rabû. Ji ber lehiyê zeviyên çandiniyê yên li wê herêmê di bin avê de man.
Tê texmînkirin ku baran dê di rojên pêş de jî berdewam bike. Rayedaran hişyarî da welatiyan ku li hemberî lehî û rabûna avê baldar bin.