Li Êlihê berfê jiyan rawestand: Rêya Qubînê û Sanayiyê asê ma

Barîna berfê ya ku li Êlihê bibandor e, bandoreke neyînî li çûnûhatina bajêr dike. Ji ber ku rê şemitok (lîskok) bûn, bi taybetî li ser rêya Êlih-Qubînê (Beşîrî) û li herêma Organîze Sanayiyê trafîk gihîşt asta rawestandinê.

Ji ber berfa giran û qeşayê, gelek wesayît li ser rêyan asê man û hinek wesayît jî bi zehmetî pêş ve diçin.

Hinek welatiyên ku neçar bûn biçin ser karên xwe, ji wesayîtan peya bûn û rê bi peyatî derbas kirin. Hat dîtin ku li Herêma Organîze Sanayiyê trafîk bi temamî girtî ye.

Rayedaran hişyarî da welatî û şofêran ku heta pêwîst nebe dernekevin derve, wesayîtên komî (toplu taşıma) bikar bînin û baldar bin. Tê payîn ku barîna berfê di nava rojê de berdewam bike û rê şemitok bimînin.