Serokê Giştî yê HÜDA PARê Zekeriya Yapıcıoğlu di peyama ku ji ber Cejna Qurbanê weşand de, berî her tiştî bal kişand ser rewşa Mesgîda Eqsayê û welatên Îslamê yên di bin dagirkeriyê de ne û got: "Divê em cejnê; wekî fersendekê bizanibin ji bo bi dawîbûna xeyidandinan, girtina dilê mezinên xwe bi taybetî dê û bavên xwe û qezençkirina duayên wan ên xêrê."
"Esareta yekemîn qibleya me Mesgîda Eqsayê dilê me dişewitîne"
Yapıcıoğlu yê ku bal kişand ser rewşa welatên Îslamê yên di bin dagirkeriyê de ne û xemgîniya qibleya yekemîn Mesgîda Eqsayê, van îfadeyan bi kar anî: "Em aramî û şahiya gihîştina Cejna Qurbanê ya pîroz a ku bi hewaya dilovanî, bereket, parvekirin û birayîtiyê dilê me dorpêç dike, dijîn. Her çend êşên ku li welatên Îslamê yên di bin dagirkerî û êrîşan de ne û bi taybetî esareta yekemîn qibleya me Mesgîda Eqsayê dilê me biêşîne û bişewitîne jî, cejn rojên hîvî, piştgirî, vejîn û birayîtiyê ne."
"Divê em yekîtî û birayîtiya xwe biparêzin"
Yapıcıoğlu yê ku diyar kir îbadeta qurbanê; yek ji nîşaneyên herî bihêz ên teslîmiyet, sedaqat, parvekirin û nêzîkbûna li Xwedê ye, peyama xwe weha domand: "Ez ji Xwedayê Dilovan lava dikir ku duayên birayên me yên li Arafatê sekinîne, îbadetên Hecê yên ku bi cih anîne û qurbanên hatine serjêkirin qebûl bike. Bê guman em di serdemekê re derbas dibin ku tê de zilm zêde bûye, neheqiya gerdûnî gihîştiye asta herî bilind û nirxên mirovî û exlakî bi eşkereyî hatine binpêkirin. Di demeke weha de, têkoşîna ji bo rûniştandina heqîqetê û avakirina dadperweriyê, wezifeyeke mezin a mirovahiyê ye. Ji bo ku em vê wezifeyê bi rengekî herî baş bi cih bînin, divê em bi hev re bi pîpika (wersa) Xwedê ve sersax (şidandî) bigirin, yekîtî û birayîtiya xwe biparêzin."
"Divê em cejnê ji bo qezençkirina duayên xêrê yên mezinên xwe wekî fersendekê bizanibin"
Yapıcıoğlu yê ku di rojên cejnê de behsa girîngiya piştgiriya civakî û seredana xizm û welat (sila-i rahim) kir, bangawazî weha kir: "Divê em cejnê; wekî fersendekê bizanibin ji bo bi dawîbûna xeyidandinan, girtina dilê mezinên xwe bi taybetî dê û bavên xwe û qezençkirina duayên wan ên xêrê. Divê em bi hev re hewayeke wisa ya cejnê bidin jiyandin ku tê de sêwî werin şakkirin, xizan û hejar bêtin parastin, xerîb û bêkes bêtin bîranîn."
Bi 4 zimanan mesaj pîrozkirina cejnê
Yapıcıoğlu şofêrên ku ji bo seredanên cejnê û dîtina xizman (sila-i rahim) derkevin rê jî hişyar kir ku pabendî qaîdeyên trafîkê bibin û bi bêxewî û westayî rûnenên li pişt dîreksiyonê. Yapıcıoğlu mesajê xwe bi pîrozkirina cejnê ya bi zimanên Tirkî, Zazakî, Kurmancî û Erebî bi dawî kir:
"Birayên min ên ezîz û qîmetdar! Ez we bi hurmet û hezkirin silav dikim, gelek cejnên tije aramî û bereket ji bo we dixwazim. Bayramımız mübarek olsun. Roşané ma bımbarekıb. Cejna me pîroz be. İyd mubarek."