Çinarê ma yo ke bi erdê xo yê ziraeti mıntıqa de cayê dı babet o, emser vewra gure û dıma zi şiliya ke vara, ruyê rençberan kerd şa.
Rençberê Qerecdaxî na ra dıma hîs û fikrê xo pare kerdî, memnuniyetê xo ardî ziwan û seba na bereketi va ke: 'Vewra ke vara çewres rojî erd de mende, nêhelîya'.
Sinan Asar
Sakinanê dewa Delavgurî (Çatmadal) ra Sinan Asaro 73 sereyî va ke, vist serran ra nat ê hesretê na manzara bî û wina dom kerd: 'Nêzdiyê 15 serran o ke qırtî (huyayen) estbî. Bi na şiliya emseri lari (leri) ser de şiyî, kanî (çımey) amê pıro, golıki kerdî pırr. Emser maşallah vewre vara, dıma zi şiliye amê vewre helna. Belki vist serrî bi ma çi wina nêdîbî. Emser bereket est o. Par sondajê ma zi nêresayêne ma, ma nêşayêne ekin (tohm) bikerê la emser şiliye zaf o, inşallah ekinê ma zi do hewl bê'.
Ramazan Asar
3-4 serran ra dıma, lari (leri) ma reya verêne o ke wina biyo pırr û coşayo"
Ramazan Asarî zi wina va:
"Vezîyetê awanê emseri, goreyê serranê veri zaf hewl o. Emser vewre zi zaf vara, şiliye zi. Nêzdiyê 4-5 serran bi ke lari (leri) ma nêvışiyêne, la emser awe dî û bendavê ma zi pırr biyî. Tabi, verê şiliye û vewre de rayê ma zi xira biyî, resayîşê ma bırriya, na babete de hinekî sıkıntı ancenê. Emser dıyayê (kuyuyê) ma zi hewl ê. Emser ma zivistano raştıkên dî.
Eyub Açilan
Eyub Açilanî va ke vewra gure ya ke serranê dergan ra dıma vara, bereketi kerd pıro û wina dom kerd: 'Goreyê serranê veri, emser halê ma zaf hewl o. Nêzdiyê çend serran bi ke ma wina şiliye û vewre nêdîbî. Şıkurê Homa (Allah) bo, ma zivistanê de rınd dî. Vewre zi vara, şiliye zi. Vewra ke vara, çewres rojî erd de mende, nêhelîya. Kanî (çımey) ma zi şirşir vışenê. 3-4 serran ra dıma, lari (leri) ma reya verêne o ke wina pırr biyî û coşayê'.