Piştî êrîşên mûşekî yên li pey hev ên Îranê, tê ragihandin ku pergalên parastina hewayî yên rejîma sîyonîst di rewşa amadebaşiyê de ne. Li gorî analîzek ku di rojnameya Washington Postê de hatiye weşandin, pergala parastina mûşekî ya rejîma sîyonîst niha di talûkeya zêdebargiraniyê de ye û depoya mûşekên astengker ên wê bi giranî kêm bûye.
Li gorî agahiyên ku rojnameyê ji hêla pispor û rayedarên leşkerî ve îspat kiriye, rejîma Tel Avîvê tenê bi piştgiriya leşkerî ya Emrîkayê dikare xwe li hember van êrîşan biparêze. Heger ji Emrîkayê piştgirî neyê dayîn, parastina hewayî ya rejîmê tenê dê bikaribe 10 hetta 12 rojên din li ber xwe bide.
Dîsa, heman analîz îddîa dike ku Îranê di êrîşên xwe yên dawî de nêzîkî 400 mûşek avêtine, ku piraniya wan di hewayê de hatine îmhakirin. Lêbelê, tê gotin ku lêçûna her mûşekek astengker zêde ye û bi vê leza zêde domdarî ne mimkûn e.
Rojnameya Washington Postê destnîşan dike ku rejîma sîyonîst niha bi qasî 285 milyon dolar di şevekê de xerc dike, ev rêje di demek dirêj de ew ê kapasîteya wê ya parastinê pir kêm bike.
Li hember vê yekê, Îran armanc dike ku bi êrîşên erzantir û dijwartir rejîma sîyonîst lawaz bike. Ger êrîşên mûşekî berdewam bikin, îhtîmala ku rejîma sîyonîst kontrola qada hewayî ya xwe winda bike, li ser maseyê ye.
Pispor dibêjin eger Emrîka piştgiriya leşkerî berdewam neke, dibe ku sîstema parastinê ya rejîmê bi tevahî bêtesîr bibe.
Ji ber vê yekê, rêça şerê mûşekî yê ku bi Îranê re dest pê kiriye ne tenê bi şiyana leşkerî, lê di heman demê de bi piştgiriya derve û domdariya aborî jî dê were destnîşankirin. (ÎLKHA)