Peyê vevra ke temamê Tırkiya de şidetî biya fîraz; cemed (vêşa) û seqayî bi taybetî fekê Rojhilatê Anadolu û deryayê Sîyayî de heyat zaf xirab kerd. Badê hişyarîyanê Meteorolojî, seba ewlehîya teleban (wendekaran) û xebatkaranê dewlete, tayê walîtîyan mektebî kerdî tatîl.

Erzurum de; Aşkale, Tekman, Karayazı û Xınıs de temamê mekteban amê gıretış. Xorasan de zî seba telebanê taşımalîyî mektebî amê tatîl kerdene. Aziziye, Palandöken û Yakutiye de zî seba vevre wendene vindarnîya. Cênîyê avisî (pizere) û xebatkarê astengdarî zî bi îznî amê amartene.

Gümüşhane de zî va ke vevre do parçe-parçe dewam bıkero û seba cemedê şanıki (sıbayi) temamê bajari de mektebî kerdî tatîl. Xebatkarê ke grubê rîskî de yê zî amê îznî.

Dêrsim de; Ovacıx, Nazmîye û Pulur de temamê mekteban de, Xozat de zî seba telebanê taşımalîyî wendene vindarnîya. Heyetê Hıfzısıhha yê qezan seba ewlehîye no qerar da xebatnayış.

Meqeletiye (Meletî) de; qezay Arapgîrî de dewanê koyan de semedê pırtayî (tipi) û cemedî ra wendena taşımalîyî bırîya.

Çolig (Bîngöl) de; qezay Kanîreş de seba vevra şideti û rîskê resayîşî, temamê mektebanê dewlete û ê özelan de wendene amê vindarnayış.

Bayburt de; merkezê bajari û qezan de temamê mekteban, kursan û merkezê rehabilitasyoni seba rojeke amê gıretış.

Erzıngan de zî seba vevre; mektebanê dewlete û ê özelan de, kursanê Qur’anî û kreşan de wendene amê vindarnayış.