"Piştî ku Daîreya 7’an a Cezayê ya Dadgeha Edliyeya Herêmî ya Amedê, biryara dadgeha herêmî ya ku ji bo sûcê 'parastina sûcdar' di kuştina Narin Gürana 8 salî de dabû li dijî hiqûqê dît; darizandina ji nû ve ya 12 bersûcên negirtî û 3 zarokên ku ber bi sûc ve hatine birin, dest pê kir.

Di rûniştina girtî ya li Dadgeha Cezayê ya Asliye ya 17’an a Amedê de, 2 bersûc, zarokekî ber bi sûc ve hatî birin û parêzerên wan amade bûn. Di danişînê de biryara Daîreya 7’an a Cezayê hat bi bîr xistin ku tê de hatibû gotin 'mafê tevlîbûna rasterast' nîn e; ji ber vê yekê hat biryardan ku parêzerên Wezareta Malbat û Xizmetên Civakî û Komeleya Têkoşîna li Dijî Îstismara Zarokan a Mamoste Saadet beşdarî rûniştinê nebin.

Dadgehê bal kişand ser biryara Daîreya 1’emîn a Cezayê ya Dadgeha Bilind (Yargıtay). Dadgeha Bilind biryar dabû ku cezayê 4 sal û 6 mehî yê li bersûcê girtî Nevzat Bahtiyar hatibû birîn, di çarçoveya 'alîkariya kuştina bi qestî' de were nirxandin û Bahtiyar li Dadgeha 8’emîn a Cezayê Giran ji nû ve were darizandin. Li ser vê yekê, dadgehê biryar da ku ji Dadgeha 8’emîn a Cezayê Giran were pirsîn ka ji bo daxwaza yekkirina dozan razîbûn (miwafaqat) heye an na. Danişîn ji bo temamkirina kêmasiyan hat paşxistin."