Serekê Şaxê Diyarbekirî yê HÜDA PARî Zeynul Abidin Gülsever, mehelleyê ke tede xeta qaza tebiî çinya, înan ra mehelleyê Fatih, Kaynartepe û Yunus Emre gırotî roşna xo ser. Gülseverî va ke şarê nê mehelleyan seba germbîyayene û hewcehîyanê bînî mecbûr elektrîkî gureyneno û na ri ra zî faturayê zaf berzî yenê.

Gülsever, Serekê Şaxê Baglarî Orhan Zerenî reyde Mehelleyê Fatihî de şarî de ame pêser û goş na daxwaz û şîkayetanê înan ser. Şarê mehelleyî va ke qazê tebiî çinyo û şîrketa Dicle Elektrîkî (DEDAŞ) zî faturayan de tarifeya qat-qatî (kilovatî) pêk ana, na rewşe zî mexdurîyetêko gıran virazena.

Gülseverî nê barê de veng da rayedarîyan û va: "Ya nê mehelleyan rê qaza tebiî bıdê ya zî faturayan ra tarifeya qat-qatî darenê we."

"Temelê meselanê înan, çînyebîyayîşê qaza tebiî yo"

Gülseverî badê zîyaretanê xo nê pareyî kerdî: "Ewro ma serekê qezayê ma Orhan Zeren û ekîbê xo reyde esnafanê Mehelleyê Fatihî zîyaret kerd. Xususan na caddeya ke ma nika ser o yê û na cadde reyde Kaynartepe, Yunus Emre û tayê mehelleyanê bînan de eynî mesele esta. Ma nê meselî esnafanê xo ra goştarî kerdî; ma mîyanê şarî de, merdimanê xo de û niştoxanê mehelleyî de amey pêser, ma goş na meselanê înan ser. Temelê meselanê înan, çînyebîyayîşê qaza tebiî yo. Nê mehelleyî binê nameyê 'Vurîyayîşê Sûke' (kentsel dönüşüm) de ameyî rawestnayene, dıma na qerar amê betalkerdene û na ri ra zî qaza tebiî nêdîyaya nê mehelleyan. Çike qaza tebiî nîna dayene, şarê nê hetî wextê zimistanî de hewcehîya germbîyayenî bi elektrîkî vînênî. Germbîyayene, fîştene/şûtene û heme hewcehîyanê xo yê bînan bi elektrîkî temîn kenê."

Gülseverî bal ont serê faturayanê Dicle Elektrîkî (DEDAŞ) û va: "Bingeyê nê meselanê elektrîkî de kerdunê (semedê) DEDAŞî esto. Usûlê înan wina yo: Eke hemwelatî heta 240 kîlovat elektrîk bixebitno se fîyet qatêk zêde beno; eke 330 kîlovatî derbas bibe, fîyet beno 2-3 qat. Hemwelatîyê ke Caddeya 75î de nîşênê, bi qaza tebiî germ benê û aşme de 4-5 hezar lîra danê; la hemwelatîyê nê mehelleyan çike bi elektrîkî germ benê û sistem zî 'qat-qatî' yo, nêzdîyê 10 hezar lîrayî fatura danê. No zilm o. Nê merdimî qezencê xo kêm o û şarê orta yê, labelê şarê mehelleyanê zengînan ra qat bi qat zêde fatura danê."

"Ma wazenîmê ke sistemê faturayo qat-qatî bêro daritene we"

Gülseverî seba çareserkerdena nê mexdurîyetî waştişê xo yê ra dezgehanê elaqedaran wina pare kerdî: "Na ri ra, daxwazê ma û merdimanê nê mehelleyan o yo ke wa leze qaza tebiî bêra. Eke qaza tebiî nîna dayene, wa Dicle Elektrîk na tarifeya qat-qatî abonayanê bêqazî ser ra dare we. Seba nê hukmatê merkezî, wezaret, Wezaretê Enerjî ya zi rayedarê naca müdahale kenê... ma wazenîmê ke no problemê faturayo qat-qatî bêro çareserkerdene."

Gülseverî wina domna: "Meselê bînî yê nê mehelleyan zî estê la ma nika înan nêvanîmê. Meseleya esasî na ya. Seba nê problemî bi hezaran merdiman cayanê cîya-cîyan rê dılekçeyî dayî. Ameyî partîya ma zî, daxwazê xo ma rê vatî. Ma zî ewro vejîyayî meydan û ma goş na nê meselan ser. İnşallah ma do nê meselan dima bê. Heta ke ma na mesele neberîmê Meclîs, ma nêvindemî. Ma huzurê şarê xo de vanîmê ke heta no problem çareser nêbo, ma do her wext şopdarê nê karî bê."