Navenda Giştî ya HUDA PARê derbarê mijarên sereke yên rojevê de daxuyaniyek nivîskî da çapemeniyê.

Di daxuyaniyê de, ku behsa qirkirina ku ji teref rejîma îşxalker a sîyonîst ve li Xezzeyê pêk hatiye kir, hat gotin ku pêvajoya qaşo agirbestê ne ji bo aştiyê, lê ji bo hovîtiyê xizmet kiriye. Di daxuyaniyê de, bi balkişandina ser wê yekê ku şertên peymanê bi piranî hatine paşguhkirin, wiha hat gotin: "Pêvajoya qaşo agirbestê ya ku di 10ê Cotmeha 2025an de hat ragihandin, ji bo rejîma terorîst a sîyonîst amûrek bûye da ku komkujiyên xwe veşêre, ne gavek ber bi aştiyê ve ye. Heta niha, tenê %38ê şertên peymanê hatine bicîhanîn; rewşa mayî jî xwînrijandin, birçîbûn û bêmalî ye. Wekî din, ji dema agirbestê vir ve, zêdetirî 730 birayên me yên Filistînî, di nav de 120 zarok, şehîd bûne, bi hezaran birîndar bûne û deverên îşxalkirî bi bêwijdanî hatine berfirehkirin."

"Zextkirina li ser berxwedanê ji bo çekberdanê qet nayê qebûlkirin"

Di daxuyaniyê de, ku tekez kir ku helwesta qaşo "Konseya Aştiyê", ku welatên Misilman jî di nav de ne, xelet e, wiha hat gotin: "Ti mafdarî tune ku ji bo 'çekkirinê' demek ji bo berxwedana Filistînê were danîn. Ji bo kesên ku di demekê de ku gel di konan de ji bo jiyanê têdikoşe, yek cezayê jî li ser îşxalker ferz nakin, bi tevahî nayê qebûlkirin ku zextê li berxwedanê bikin."

"Em bang li raya giştî ya cîhanê dikin ku vê dorpêça qirêj a şantajê ya li dijî Filistîniyan bişkînin"

Daxuyanî bi van gotinan berdewam kir:

"Ev helwesta li hember gelê Filistînê ne vexwendinek ji bo aştiyê ye, lê belê ji bo teslîmbûn û komkujiyên nû ye. Pêşşertê danûstandinan ne bêçekkirina berxwedanê ye, lê belê bidawîkirina bê şert û merc û teqez a îşxalkirinê ye, ji nû ve avakirina Xezzeyê bêyî ti sînorkirin û gihîştina bênavber a pêdiviyên mirovî bo Xezzeyê ye. Mîna rojên herî tarî yên şerê qirkirinê, em bang li raya giştî ya cîhanê dikin ku vê dorpêça qirêj a şantajê ya li dijî Filistîniyan bişkînin."

Di daxuyaniyê de her wiha piştgiriya xwe ji bo înîsiyatîfa Fîloya Cîhanî ya Sumud, ku roja Yekşemê 12ê Nîsanê ji Bendera Barcelonayê bi armanca şikandina dorpêça li ser Xezzeyê dest bi rêwîtiyê kir, hat ragihandin. (ÎLKHA)