Ji ber bilindbûna asta ava di rûbara çemê ku di nav gundê Keldiskê de derbas dibe de, gundî mexdûr dibin. Gundê Keldiskê nêzîkî 44 kîlometreyan dûrî navenda navçeya Çinarê ye.

Şêniyekî gund derbarê mijarê de daxuyanî da û wiha got: 'Me berî 3 salan bi derfetên xwe zemîna vir bi beton çêkir, nexwe ger av tunebe jî bi wesayîtan derbasbûn nepêkan e. Me ev rewş ji Şaredariya Çinarê re ragihand, Şaredariya Çinarê em şandin DSÎyê (Karên Avê yên Dewletê). DSÎyê jî em şandin Şaredariya Bajarê Mezin a Amedê. Em li vir mexdûr in, niha nexweşekî me yê jidayikbûnê (ducanî) heye, em nizanin em ê kîjan saetê bibin doktor. Înşallah şert û mercên hewayê rê bidin, nexwe di vê rewşê de em ê zehmetiyeke mezin bikişînin. Em ji rayedaran çareseriyekê dixwazin. Ji aliyekî heta aliyê din tenê 20 metre ye, em dixwazin mexdûriyeta me bê rakirin.'

Hat ragihandin ku ji ber barana ku êvara îro bariya û hîn jî berdewam dike, asta avê hîn bêtir bilind bûye û gundî di nava tirs û fikarê de ne.