Li Çinarê xebatên lêgerînê: 3 roj in xeber ji Nîmet Kiliç nayê girtin

Nîmet Kiliç a ku li gundê Kubacika Çinara Diyarbekirê dijî, di 21ê Rêbendanê de serê sibê zû ji mala xwe derket û careke din xeber jê nehat girtin.

Hevjînê wê Şêxmus Kiliç, gava dît ku jina wî ne li ser cihê xwe ye, ewilî agahî da gundiyan. Piştî ku di lêgerînên ewil ên li gund de encamek nehat girtin, xeber dan Navenda Banga Acîl a 112an.

Li ser îhbarê, tîmên AFAD, cendirme û tenduristiyê sewqî herêmê hatin kirin. Tîman, li gundê Kubacikê û derdora wê xebateke berfireh a lêgerînê dan destpêkirin. Tevî barîna berfê jî; tîm li qadên gundewar, erdên çandiniyê, gelî û cihên avî xebatên xwe didomînin. Her wiha tîmên Lêgerîn û Rizgarkirina Binê Avê ya Cendirmeyê (SAK) û kûçikên lêgerînê yên kadavrayê jî piştgiriyê didin xebatan.

Hat hînbûn ku tevî şert û mercên giran ên hewayê û erazî, xebatên lêgerînê bi hûrgulî û bi awayekî koordînelî berdewam dikin.