Saziya Piştgiriya Pêşketina Çandinî û Gundî (TKDK), di çarçoveya Bernameya IPARD III de salnameya bangewaziya ya derbarê sala 2026an de weşand. Di çarçoveya bernameya hatî eşkere kirin de li Diyarbekirê zêdekirina hilberîna çandiniyê, bilindkirina hêza reqabetê ya kargehan û xurtkirina aboriya gundî tê armanckirin.

Di çarçoveya Bernameya IPARD III de di dirêjahiya sala 2026an de; pirrengkirina çalakiyên cotkariyê û pêşxistina kar, îşlekirin û bazarkirina berhemên çandinî û masîvaniyê û veberhênanên ji bo hebûnên fîzîkî yên kargehên çandiniyê dê werin piştgirîkirin. Her wiha veberhênanên binesaziya giştî yên li qadên gundî jî dê di nav bernameyê de piştgiriya hîbeyê bistînin.

Piştgirî; hilberîna riwekan a di qadên girtî de, berhemên xwedî nirxê zêde, çalakiyên zanaatkariyê, xwedîkirina berhemên avî, parkên makîneyan û veberhênanên enerjiya nûjen li xwe digire. Ligel vê yekê; ajaldariya şîr, ajaldariya goşt (besî), hilberîna mirîşk û hêkan û tesîsên îşlekirina şîr, goştê sor û goştê mirîşkan jî di nav qadên ku tên piştgirîkirin de cih digirin. Veberhênanên ji bo depokirin, îşlekirin û bazarkirina fêkî û sebzeyan jî dê bikaribin ji bernameyê sûd werbigirin.

Di çarçoveya bernameyê de her wiha bi tedbîra "Veberhênanên Binesaziya Giştî yên li Qadên Gundî" ve cara yekem dê piştgirî bidin saziyên giştî. Di vê çarçoveyê de li Diyarbekirê şaredariyên navçeyan û yekîtiyên rêveberiyên herêmî yên di çarçoveya qanûna bi hejmara 5355an de ne, dê bixizirên nav qada piştgiriyê. Projeyên wekî çêkirina rêyên beton û kevirên kilitî, tesîsên parzûnkirina ava vexwarinê, depoyên avê, îstasyonên pompeyê, îstasyonên veguhastina bermayiyên hişk, kirîna kamyonên çopê û sazkirina pergalên enerjiya rojê dê werin piştgirîkirin.

Li gorî salnameya bangewaziyê demên serlêdanê jî wiha ne: Pirrengkirina çalakiyên cotkariyê û pêşxistina kar di mehên nîsan-gulanê de, îşlekirin û bazarkirina berhemên çandinî û masîvaniyê di mehên hezîran-tîrmehê de, veberhênanên ji bo hebûnên fîzîkî yên kargehên çandiniyê di mehên tîrmeh-tebaxê de û veberhênanên binesaziya giştî yên li qadên gundî jî dê di mehên tebax-mijdarê de derkevin bangewaziyê.