Mebusê HÜDA PARî yê Dîyabakiri Şahzade Demir, qiseykerdişê xo yo ke kürsîyê Meclisî de kerd de, meselayê şarê herêmê ke tîya-oca pawenê ardî rojev. Demirî va ke vatandêşê Beldeya Germikê (Ilıcalar) ya Çoligi u herêma Sekeranî xizmetanê bingeyî yê sey ray, awe, perwerde u weşîye ra mehrum mendê; her wusa diyar kerd ke ganî seba onarimê ban, dukan u camîyanê Sêrt u Şirnexî ke sîl de zerar dîtbi, gavê bêrê eştiş.

"Beldeya Ilıcakê u dewanê dormeyî xizmet pawenê"

Demirî îşaret kerd ke îhtîyaco tewr lezîn ê herêmê binvîraz (altyapı) o u va ke ardîşê gaza tebiî seba şarî telebo verên o. Demirî wusa va: "Rayê dewan ê ke xirabe bîyê, xebatê asfaltî yê ke nêqedîyayê, sîstemê kanalîzasyonî yê kêmî, kemasîyê roşnayîkerdişî u problemê kanalanê awe, hema vaje heme dewan de heyatê rojane bi şiklo de xirab bandor kenê."

Demirî meselaya awdayîşî ya ke kapasîteya hilberînê zîretî rasterast bandor kena zî ard ziwan u va: “Tayê dewan de hewna goletê awdayîşî nêvirazîyayê, yên ke dest pî bîyo zî pêvajo înan yew turlî nêqedîyayo. Na wezyet, hilberîneran (çitçîyan) tengane de verdana.”

"Ciwanî lîse pawenê, xizmetanê weşîye rê resayîş çetin o"

Demirî dîqqat ant ser ke Beldeya Germikê de lîse çin o, coke ra ciwanî mecbur manenê ke perwerdeya xo nêmcet verdê u qiseykerdişê xo wusa domna: “Zaf leze awakerdişê yew lîse, telebo tewr bingeyî yê vatandêşanê ma yê aye herêmî yo. Dewonê ke girêdayê belde yê, zafê înan de sahaya futbolî, merkezê ciwanan u cayê fealîyetanê sosyalan çin ê. Seba ke ciwanî berê hetê spor u fealîyetanê sosyalan u deryê vîstişê alışkanîyanê zerardaran ra bêrê pawitene, ganî nê kemasîyî bêrê safîkerdene.”

“Tirkiya 2026 de hewna nê tewir sıkıntîyî estê, no zaf xemgîn o”

Demirî va ke tayê dewan de bananê weşîye (sağlık ocağı) de personel çin o u wusa qisey kerd: “Nê problemê ke ma tîya de vanê, Beldeya Germikê u dewanê sey Newbaşlar, Elmalî, Çobantaşî, Hacîlar u Halîfanî u dormeyê înan de heme dewan de rastîya hempar a. Ray, awe, perwerde, weşîye u îstîhdam; seba nê îhtîyacanê bingeyan Tirkiya 2026 de hewna sıkıntîyî bêrê ancene zaf xemgîn o.”

Demirî veng da selahîyetdaran ke wa telebê heqdarî yê şarê herêmê demêko kilm de bêrê caardene u mexdûrîyetî bêrê wedartene.

"Afata sîlî netîceya kemasîya binvîrazî ya"

Akerdişê xo de Demirî cî da afatanê sîlî yê qezaya Misircî ya Sêrtî u qezaya Elkê ya Şirnexî zî u va: "Na wezyet sey netîceya kemasîya binvîrazî (altyapı) yê uca yê yenî hesibnayene. Vatandêşê ma vanê ke binvîrazî rê veberhenan (yatırım) nêbîyo. Islahnêkerdişê Naderesî beno sebeb ke awe bîrê rîyê bajarî. Ganî Naderesî demêko leze de bêro îslahkerdene u zerarê maddîyî zî leze bêrê tefîkerdene."

Seba onarimê camî vengdayîşê selahîyetdaran

Demirî seba herayîya afata sîlî ya dewa Ayirî (Aşağıdere) ya Elkêya Şirnexî zî wusa va: “Zaf banî u bitaybetî camîya ma zerarêko giran dît. Ma daxwaz kenê ke Walîtîya Şirnexî u selahîyetdarê bînî mexdûrîyetê na dewe vîndarê, zerar u zîyanî bidê u bitaybetî hasarê camî telafî bikerê u uca onarim bikerê.”