Rêxistinên mafên Filistînî yên bi navê Ofîsa Medyayê ya Girtiyên Îslamî derbarê komkujiya êsîrên Filistînî ji teref rejîma îşxalker ve ji 7ê Cotmeha 2023an vir ve daxuyaniyek nû weşand. Di daxuyaniyê de bal hat kişandin ku 77 êsîr bi rêbazên cûrbecûr hatine kuştin, ku di nav wan de îşkence û îhmalkirina bi zanebûn a tendurîstî jî hene.

Ofîsê pêkanînên sîstematîk wekî "sûcên plankirî û sûcên şer" bi nav kir û diyar kir ku divê rêveberiya îşxalker ji mirina êsîran berpirsyar be.

Di daxuyaniyê de ev agahî hebûn:

Ji sala 1967an vir ve, hejmara şehîdên di nav êsîrên Filistînî de gihîştiye 314 kesan, ku 77 ji wan piştî 7ê Cotmeha 2023an mirine.

Rejîma sîyonîst hêna jî termên 74 êsîrên şehîd radestî malbatên wan nake.

Rêbazên kuştinê îşkenceya hovane, îhmalkirina xwarin û tenduristî, lêdan, şokên elektrîkê, destdirêjiya cinsî û cemidandin in.

Ev pêkanîn bi awayekî sîstematîk têne sepandin, bi taybetî li girtîgehên Sedeh Teyman, Ofer û Negev.

Di daxuyaniyê de her wiha hat diyarkirin ku 46 ji şehîdan ji Xezzeyê bûn û nasnameyên wan di encama zext û daxwazan de hatine eşkerekirin; nasnameya yên mayî jî hêna nehatiye eşkerekirin.

Rêxistinên mafên Filistînî diyar kirin ku di 16ê Cotmeha 2023an de, Desteya Êsîrên îsraîlê mafên girtiyan bi tedbîrên awarte sînordar kir, û du roj şûnda, wezîrê ewlehiyê van pêkanînan fermî kir û êsîr bi giranî di odeyên teng de dihatin girtin.

Şahidiyên girtiyên serbestberdayî îşkenceyên hovane yên ku ji Xezzeyê hatine, nemaze piştî ku ji dibistan, nexweşxane û xalên kontrolê hatine girtin, piştrast dikin.

Nivîsgeha Medyayê ya Êsîrên Îslamî bang li civaka navneteweyî û mekanîzmayên edaletê kir ku van sûcên li dijî êsîran belge bikin û piştrast bikin ku berpirsiyar dê werin cezakirin. (ÎLKHA)