Olga Cherevko, Berdevka Ofîsa Neteweyên Yekbûyî ya ji bo Koordînasyona Karûbarên Mirovî (UNOCHA), bal kişand ser rastiya dijwar a li Xezzeyê û got ku biryarder bi mehan e bi bêdengî dîmenên zarokên xwînî, lingên jêkirî û dêûbavên xemgîn temaşe dikin.

Cherevko got, "Piştî nêzîkî 18 mehan ji şerê xwînî, Xezze di nav kavilan de ye. Kolan tijî kavil in û dengê zarokên ku dilîzin ji hêla dengê teqînan ve tê qut kirin."

Cherevko got ku rejima îşxalker du meh berê sînor girt da ku rê li ber ketina alîkariya mirovî û kelûpelên din bo Xezzeyê bigire, û ev yek jî bû sedema jimartina paşve bo senaryoya herî xirab. "Embarên xwarinê bi piranî xilas bûne, gihîştina avê ne mumkin dibe, û nexweşxane radigihînin ku yekîneyên xwînê xilas dibin. Qurbaniyên mezin berdewam dikin. Di nav kêmtirî mehek û nîvekê de, zêdetirî 420,000 kes li Xezzeyê neçar man ku careke din birevin. Gelek ji wan tenê bi cilên li ser pişta xwe gihîştine stargehên qerebalix, di rê de gule lê hatine reşandin. Kon û tesîsên din ên ku mirov lê digerin ewlehiyê têne bombebaran kirin."

Olga Cherevko destnîşan kir ku dema ku cîhan temaşe dike tirs û xof li Xezzeyê berdewam dike, ev rewşa xirab dikare were berevajîkirin ger amûrên hewce peyda bibin, û ger deriyên sînor ji nû ve werin vekirin ew amade ne ku alîkariyê belav bikin.

Cherevko destnîşan kir ku du vebijêrk li pêşiya civaka navneteweyî hene: an temaşekirina dîmenên tirsnak ên xeniqandin û birçîbûna Xezzeyê berdewam bikin, an jî gavên wêrek û exlaqî bavêjin da ku vê dorpêça hovane bişkînin.

Cherevko got ku ew nîgeran e ku mirov li hember kuştinên berdewam ên li Xezzeyê bêhesas dibin. "Hejmara mirovên ku hatine kuştin an birîndar bûne bûye rastiyek din a ecêb ku divê were pîvandin. Ez ditirsim ku di pênc, deh an bîst salan de em ê li zarok û neviyên xwe binêrin û nikaribin ji wan re rave bikin ka çima me nekarî vê tirsê rawestînin. Ji bo ku ev bi dawî bibe, divê çiqas xwîn bê rijandin?" (ÎLKHA)