​​​​​​Ji sala 2012yan vir ve ji teref Weqfa Evîndarên Pêxember ve li seranserê welêt pêşbirka sîyerê tê tertîpkirin ku îsal 14emîna pêşbirkê hat tertîpkirin û temaya îsal a pêşbirkê “Wî Bixwîne û Wî Bijî” bû ku li 78 bajaran zêdetirî 200 hezar kes beşdarî pêşbirkê bûn.

Pêşbirka ku ji 4 kategorîyan pêk dihat di 11.00an de dest pê kir û di seat 12.30î de bi dawî bû.

Emre Çevrîmê ji berdevkên Stenbolê yê Weqfa Evîndarên Pêxember derbarê îmtîhana ku hat lidarxistin de nirxandinan kir.

Çevrîmê ku di destpêka axavtina xwe de diyar kir armanca wan hînkirina jiyana Hz. Muhammed e derbarê mijarê de wiha got: “Ji sala 2012yan vir ve em pêşbirka sîyerê tertîp dikin. Ji destpêkê heta niha eleqeyeke mezin ji pêşbirkê re tê nîşandan. Me li Esenyurtê li pênc mekteban pêşbirkê tertîp kir. Dayikan bi destên zarokên xwe girtin û ew anîn mektebê. Armanc û meqseda me ji tertîpkirina vê pêşbirkê ew e ku heyata Pêxemberê me bê hînbûn. Di netîceya pêşbirkê de gelek xelat û hedîye hene ku ji van ya herî mezin xelata umreyê ye.”

Çevrîm di dawîya nirxandina xwe de ji wan kesên ku keda wan di tertîpkirina vê pêşbirkê de hene re û ji wan kesên ku beşdarî pêşbirkê bûn re teşekkur kir.(ÎLKHA)