Badê zivistana giran û varanê rehmanî yê ke nê wextanê peyênan de bîyî, herêma Qerejdaxî de pirsgirêka rayan vejîya meydan. Şarê dewanê Çinarî yê ke herêma Qerejdaxî de manenê, nêrazîbîyena xo nîşan dayî û vatî ke badê vewr û cemidî rayê înan bîyê xirabe û kewtê halê de winasî ke nêşênê bixebitnê."

"Niştecihê dewan aşkere kerd ke transportê mîyanê dewan bîyo sey ezabêk. Ê vanê ke ma gileyîyê xo resna her meqamî la kes ma nêşêno, sazîyê dewlete vera nê meseleyî bêveng mendê. Şarê herêmê seba nê bêvengî û eleqenêdayîşê saziyan sîtam keno.

Mehmet Salih Gizli

"Ma serra 2016 ra nata nê rezaleti ancenê."

Niştecihanê dewa Qubikî (Bulutçeker) ra Mehmet Salih Gizli va: "Halê rayan qet hewl nîyo, rayê mîyanê dewe zaf xirab ê. Wexto ke ewcetîyêk (lazemîyêk) bibo, nêşênê bi wesayîtan şêrê û bêrê, zaf zor beno. Servîsê wendekaran estê, wesayîtê dewe estê... Ma verênde zî halê nê rayan çapemenî de pare kerd û ewro reyna vanê: Ma bi taybetî wazenê ke rayê mîyanê dewe bêrê viraştene. Wesayîtê ma xirab benê, tekerê ma deşîyenê (pate benê), şarê ma mexdur o. Nê rayî berpirsîyarîya Şaredarîya Bajarê Pîlî de yê yan zî yê Rêyê Bejayî (Karayolları) de yê ma nêzanenê, la ma venga înan danê: Ma wazenê rayê ma bêrê viraştene.

Selman Akbaş

Selman Akbaşî zî vera eleqenêdayîşê saziyan sîtam kerd û va: "Raya mîyanê dewe ra bigîrê heta rayanê verê keyan, her ca bîyo xirabe. Wesayîtêk ke biwazo şêro, mîyanê herre de maneno. Rayê mîyanê dewe pêro bîyê sey bataklikî, herre û lome mîyan de yê. Ma çend rey serlêdan kerd, la kes vengê ma nêşêno. Badê vewrê, rayî pêro xira bîyî, tekerê wesayıtan deşîyenê. Kal û pîrê ma nêşênê şêrê û bêrê. Tenê nê ca de nîyo, keyeyê ke pey de yê, rayê înan qet çîn ê. Seba problemê rayan, domanê ma nêşênê wextê xo de birasê mektebî."

Akbaşî qiseyê xo wina domnayî: "Wexto ke vewr varîyê, şaredarîye rayê ma nêkerdî ra, ma bi imkanê xo rayî kerdî ra. Badê cemidî halê rayan zaf xirab o. No dımat nîyo (no normal nîyo). Ma serra 2016 ra nata nê rezaleti ancenê.

Şevket Kılıç

Şevket Kılıçî, niştecihanê dewa Qerejbelkê (Karaçbelik) ra yo, va ke mîyanê dewe de tewr peyên 20 serrî verê cû xebata qumkerdişî (kumlama) bîya: "O wext ra nata qet xebatêka bîn nêbîya. Ma şonê Şaredarîya Çinarî (Xanê), vanê 'rayê ma çîn ê', ê zî vanê 'temam ma yenê' la nîyenê û nêvirajenê. Keyeyanê ma de nêweşê ma estê, berdene û ardene zaf zor bena. Bi raştî ma perîşan ê. Servîsê mektebî nêşênê bîrê berê keyan. Coke ra domanê ma perwerde ra mehrum manenê, nêşênê şêrê mekteb."

Kılıçî wina dewam kerd: "Ma çend rey serlêdan kerd Şaredarîya Çinarî, ê vanê 'no ca aidê Şaredarîya Bajarê Pîlî yo'. Labelê şixulê Şaredarîya Bajarê Pîlî rayê grupî yê, rayê mîyanê dewe şixulê şaredarîya qezayî (ilçe) yo.

Mehmet Salih Açılan

Niştecihanê dewa Delavgurî ra Mehmet Salih Açılanî zî wina va:

"Halê rayanê ma dîyar o, bi raştî yew 'dayîyê' ma zî çîn o ke nê problemê ma çareser biko. Tewr peyên bi wesîleya qereqolî xebatêka şenık bîye, o wext ra nata cayê ke dema peyên de viraştê, rayê înan qet çîn ê. Wesayîtî nêşenê şêrê, ma tewreyê ardê xo yan zî erzaqê xo pîşta xo de (sırtımızda) anenê û benê. Verê vewre rayê ma xirab bîyî, badê vewre pêro bîyî xirabe. Ma vanê saziyanê selahiyetdaran re, la kes ma de nêasêno.