Seba malim û telebeyê ke hêrişê mekteban de merdê, Diyarbekir de namazê cenazeyî yo gıyabî ame kerdene

Seba malim û telebeyê ke hêrişanê çekdaran ê mektebanê Sêwrega Riha û Onikişubata Gurgumî de merdê, Diyarbekir de dima namazê cumayî namazê cenazeyî yo gıyabî ame kerdene û eşkerayîya çapemenîye ameye dayene.

Sere dıbıneya Serkaniya Memur-Senî ya Diyarbekirî de, seba malim û telebeyê ke hêrişanê çekdaran ê mektebanê Sêwrega Riha û Onikişubata Gurgumî de merdê, dima namazê cumayî namazê cenazeyî yo gıyabî û programê eşkerayîya çapemenîye ameyî vıraştene.

Meqezê Sûrî de, Camîya Gırde ya tarîxî de dima namazê cumayî, şarê Diyarbekirî seba malim û telebeyanê ke merdê namazê cenazeyî yo gıyabî kerd. Dima namazî, verê Camîya Gırde de eşkerayîya çapemenîye hetê Serkanê Memur-Senî û Serkanê Şubeyê Eğitim Bir-Senî Ramazan Tekdemirî ra ameye wanene.

Tekdemirî va ke ma sey xebatkaranê perwerdeyî seba ke pawıtışê mekteban bêro kerdene, heruna sanalî bêro teqibkerdene û hıssîyet bêro mîyan, 3 rojî kar caverda. Tekdemirî aşkere kerd ke mesajê înan ameyê fêmkerdene, vera şîdetî tayê tedbîrê heralî ameyê gırowtene û ê bînî zî do bêrê gırowtene.

Tekdemirî va, 'Ma sey xebatkaranê perwerdeyî, telebeyan û mektebanê xo qet tenya nêverdame' û wina domna: 'Ma sey xebatkaranê perwerdeyî, do her wext telebeyan û mektebanê xo ra wayîr vejîyê. Ma do bi coş û waştişê de pîlî mektebanê xo de serê karê xo de bibe. Ma do vera lîstikanê qirêjan ê odakê şerî de tîk vinderê. Ma vera xetere û tehdîtanê terorê dîjîtalî veng danê her kesî ke wa her kes wezîfeyê xo bîyaro ca. Ma vera hêrişanê dinyaya sanalî de, waştenê ma o yo ke şarê ma wa telebeyan, dezgehan û xebatkaranê perwerdeyî ra wayîr vejîyo.

Tekdemirî va ke perwerde ne tenya mekteb de, her qada heyatî de yew erjo o ke ganî bêro pawıtene û wina domna: 'Ma hêrişê ke vera mektebanê ma benê, seba miletê xo sey meseleya bekayî vînenê. Bekaya miletê xo, ameyoxê ciwananê xo, ewleyîya ganê doman û xebatkaranê perwerdeyî her çî ra ser vînenê. Na çarçove de, meseleya sînorkerdışê emrê 15î seba xebatnayışê medyayê sosyalî, êndî tenya nîzamnameyek nîyo, seba ameyoxê welatê ma meseleyêka ewleyî ya cîdî ya. Seba ke ma doman û ciwananê xo tehdîtanê dewrê dîjîtalî ra bıpawê, ma pawenê ke na teklîf her çi ra verî bêro qebulkerdene û bêro kerdene.

Tekdemirî diqet ant serê helwestê ê kesên ke verê cû tedbîrî rexne kerdî la dıma kerdî feryad û va: 'Tayê dorûberê ke vera nê nîzamnameyî vejîyayê û nêzdî de vatê «Mekteb qereqol nîyê, perwerde nezaretê polîsan de nêbeno», la nika meydananê Sêwreg û Gurgumî de vanê «Qey ewleyîya mekteban nêna gırowtene?», na nakokîya (çelişkîya) înan hetê miletê ma ra eşkere asêna.'

Tekdemirî îfadeyanê xo wina qedîna: 'Ma welatê Tirkîya de ke bakîyeya medenîyetêka winasî ya ke hûrmetê elm, îrfan û aliman esas gêna, wazenê ke wa qedr û qîymetê xebatkaranê perwerdeyî bêro zanayene. Ma zanenê ke yew miletê ke hûrmetê malimê xo nêkeno, imkan çîyo ke o milet bi zanayîşê xo ber bi rasti, xeyr û rindekîye şiro.

Tekdemirî va ke qebul nêbeno ke xebatkarê perwerdeyî bêrê nîşandane û wina domna: 'Pawıtışê mekteban ganî tenya sey polîtîkaya perwerdeyî nê, heman wext de sey pîvanêka bingehîne ya ewleyîya rayapêroyî (kamu) bêro vîneneye. Ma sey Eğitim-Bir-Senî, malim û telebeyanê ke nê hêrişî de merdê, Homayî ra rehmet û birîndaranê xo ra zî şîfaya leze wazenê.'

Eşkerayîya çapemenîye, bi duaya Ardimkarê Muftîyê Diyarbekirî Dr. Selahattin Yılmazî qedîyaye.