Serekê HÜDA PARê Çinarî Aziz Tekdalî, bitaybetî seba weçînayîşê dersanê Kurmanckî û Zazakî veng da û va ke ganî vera polîtîkayanê asîmîlasyonî tewir bêro girewtış.

Tekdalî diyar kerd ke komanê (şaranê) ke nêşênê ziwanê xo bîjîvênê, wext dı vindi benê û wina va: "Ma hetanî ziwanê xo nêpajîvênê (nêpaşînê), nêşênê bi îtîmad ver bi ameyoxî (îstîkbalî) şêrê. Ziwanê ma dewlemendîya coğrafyaya ma yê. Labelê bi polîtîkayanê asîmîlasyonî û qedexekerdışanê wextê xo, Kurdkî mîyanê qismêkê Kurdan de kî êndî nêno qıseykerdış. Pawıtışê ziwananê ma yo ke ayetê Rabbê ma yo, seba ma ferz o. Aye ra ziwanê xo keyeyanê xo de; bi mîyanê keyeyî, merdim û dostanê xo de û cayê karî de qısey bıkê ke neslê ma yo ameyox ziwanê maderî xo vira nêkero.

Tekdal îfade kerd ke komanê (şaranê) ke ziwanê xo vira kerdê, çend nesil ra dıme nasnameyê xo kî bi temamî vindi kenê û wina va: "Asîmîlasyon; zulm û neheqîyêka winayên a ke Rabbê ma aye qebul nêkeno û kulturo kadîm ê coğrafyaya ma de kî çîyêko winayên çîn o. Misliman nêşêno destek bido nê zulmî û nêşêno vera nê zulmî de bêveng bımıno. Cîya-cîya bîyayîşê ziwananê ma û bi hawayêko azad wayîrbîyayîşê heme heqanê ziwanî; seba tu îdareyêko meşru û adîl nêbeno tehdît. Bi tersê ci, azadîya ziwanan û fêdekerdışê heme heqan; beno wesîleyê nasbîyayîş û pêra-şîyayîşî û seba yewîyêka adîl û weş beno sey harcî.

Tekdal dîyar kerd ke ê sey HÜDA PARî polîtîkayanê înkar û asîmîlasyonî bi ziwanêko qatî red kenê û nê çekuyî vatî:

"Ma heme polîtîkayanê înkarî red kenê. Ma tu asîmîlasyonêko etnîk û kulturî yo ke wazenê şarê ma ser o tetbîq bikerê, qet qebul nêkenê. Ma ne înkarê ziwan û rengê xo, ne zî înkarê erjanê xo yê dînî qebul kenê. Ma do hem dînê xo hem zî ziwanê xo ra wayîr vejîyê.

Tekdal va ke dersê Kurdkî yê ke mektebanê mabênî de sey dersê weçinayeyî yenê diyene, her çend bes nêbê zî, dila girîng ê û wina dewam kerd: "Weçînayîşê dersanê Kurmanckî û Zazakî, seba domanê ma ziwanê maderî bımusê fırsetêko pîl o. May û pîyê ke domanê înan mektebanê mabênî de wendekar ê, wa seba dersanê Kurdkî (Kurmanckî-Zazakî) îdareyanê mekteban rê dîlekyan bidê. Reyde, hem mektebanê mabênî de hem zî lîseyan de, seba dersanê 'Sîyerê Pêygamberê Ma', 'Melumatê Dînî yê Bingeyî' û 'Qur'anê Kerîm' zî wa dîlekyan bidê. Bi nê hawayî domanê ma hem ziwanê xo hem zî dînê xo bımusê."

Serekê HÜDA PARê Çinarî Aziz Tekdal da zanayene ke wextê weçînayîşê dersanê weçinayeyan 20ê Sibate 2026 de qedîyeno û nê vengdayîşî kerd: "Bêrê, ma pêro pîya wayîrê ziwan û bawerîya xo vejîyê.