Li Hîlwana Rihayê ji ber ku bênavber ceyran qut dibe şênî mexdûr dibin, şêniyên ku ji ber qutbûnên ceyranê mexdûr bûne ji bo ava vexwarinê hespan bi kar tînin û hewil didin bi hespan avê ji kahniyên taxê bikşînin malên xwe. Şêniyên ku ji ber problem û mişkîleyan derd û kûlên xwe anîn zimên diyar kirin rayedar berê wan didin cihên cuda û ew tenê di dema hilbijartinan tên bîra rayedaran.
Şêniyên taxê derheqê mijarê de nerazîbûn û betekên xwe nîşan dan û xwestin rayedar ji problema ceyranê re çareyekê bibînin.
Şêniyê bi navê Îmam Man ê ku karê nanvaniyê dike diyar kir ew ji temamê rayedaran gilîdar e û wiha got: “Ev nêzî 10 salan e ku ava me diçe tê. Em avê dixwazin, lê her tim dibêjin ew ê sibe were. Em ji temamê rayedaran gilîdar in. Niha depo vala ye û ji sedî 90 xelkê mexdûr e. Em tenê avê dixwazin.”
Şêniyên bi navê Mehmet Asa, Mehmet Gumuş û Abdulganî Uruz jî derheqê mijarê de nerazîbûnên xwe nîşan dan û xwestin ava wan bê berdan da ku ev zehmetiya wan ji rastê bê rakirin. Şênî her wiha diyar kirin 12 parlementerên Rihayê hene û yek ji van jî bi meselê eleqedar nabe.
ÎLKHA