Li Şemrexa Mêrdînê, dijminantiya 54 salî ya di navbera malbatên Çelîk, Tekîn û Ozel de, bi navbervantiya jinan bi dawî bû. Cara ewil e ku, jin jî tevlî xwarina lihevhatinê dibin.
Ji bo bidawîkirina dijminantiya xwînî, jinên hêlên dijminan, Bûrhan Hedbî û parlementerê AKPê Ebdurrehîm Akdağ navbervantî kirin. Li Dêrika çiyayê Mazî li meydana mesîreyê, ji bo 5 hezar kesan xwarina lihevhatinê hate hazirkirin. Berî xwarinê, Qurana pîroz hat xwendin.
Di xeberdana destpêkê de, Bûrhan Hebdî wiha peyivî “Îslam dînê aştiyê ye. Li gor dînê me ğeyda ji hev û din, ji adetên cahîliyê ye. Dijminantiyeke din jî, piştî 54 salan bi dawî bû.”
Parlementer Ebdurrehîm Akdağ jî, di xeberdana xwe de wiha got “Di kultura herêmê de, ciyekî muhîm yê jinan heye. Jin dikevin navbera du dijminan û gava şaşika xwe bavêjin holê, şer û dijminantî diqede. Em ji kultur û medeniyeteke wiha hatine. Di civatê de rola jinan tayinkirox e. Tarîxa me tim wiha bûye. Civata me, hewceyî me’newiyat û merhamet û şefqatê ye.”