Hat îddîakirin ku parlementerê Mêrdîn yê serbixwe Ehmed Turk, di serdana xwe ya li Emrîkayê de, ji bo hevdîtinên dewlet û PKKê xeber bide, li eyaleta Pensîlvanyayê bi Fethûllah Gulen re hatiye ba hev.
Ehmed Turk û parlementerê Wanê yê BDPê Nazmî Gur, bi amanca behsa hevdîtinên dewlet û PKKê bikin, li Waşîngtonê hinek serdan rastkirin. Turk û Gur li Qesra Sipî bi rayedarên wezareta karên derve ya Emrîkayê û bi saziyên sivîl yên civakî re hatin ba hev.
Hat îddîakirin ku Ehmed Turk, teleba hevdîtina bi Fethûllah Gulen re kiriye û li Pensîlvanyayê hevdîtina wan pêk hatiye. Heta niha di heqê hevdîtinê de ji her dû aliyan tu beyan ne hat kirin.
Berî niha Nazmî Gur îfade kiribû ku, ji bo hevdîtina bi Fethûllah Gulen re tu programeke hevdîtinê tune ye, lê eger tiştek weha dikeve rojevê wê li ser bifikirin. BANGAHEQ