Jı Bo Qudsê Meşıyan
LI FATÎHA STENBOLÊ BI SEDAN KES JI BO QUDSÊ MEŞIYAN
Li Tirkiye û li gelek deverê cîhanê, musluman ji bo Quds û Filîstîn kom dibin, dimeşin, fealiyet û çalakî li dar dixin, tînin ziman ku Quds û Eqsa doza ummeta Îslamê ye. Diyar dikin ku divê musluman ji bo Quds û Filîstînê bixebitin heta ku ji bin îşgala siyonîst derkeve.
Her wiha li Stenbolê jî, platforma Qudsa Azad, çalakiyek li dar xist. 13 sazî û komelên sivîl jî destek dan çalakiyê. Li Camiya Fatîhê, piştî nimêja terawîh, bi sedan kes civiyan. Tekbîr û slogan avêtin. Ketin milên hev û heta parqa Saraçxane, bi panqart û tekbîr û sloganan, bi meşaleyan meşiyan.
Li Saraçxanê, der heqê Quds û azadiya Mescîda Eqsayê de, xeberdan hatin kirin. Hat îfade kirin ku Quds û Eqsa, doza hemî muslumana ye. Serekê platformê Mehmet Eşîn, li ser qîmet û qûdsiyeta Qudsê peyivî û wezîfa muslumana diyar kir. Dûre serekê komela Ozgur-Derê Ridvan Kaya, wiha axivî “Quds, ji me re yadîgarê Hz. Omer e. Em tucar dev jê bernadin. Di ferhenga me de, tiştekî bi navê Îsraîl nîne û nayê qebûl kirin. Li gor me Îsraîl ğeyrî meşrû ye.”
Paşê Taysîr Suleymanê ku 19 sal di zîndanên siyonîst Îsraîl de mabû û di bedêla Gîlad Şalît de hatibû berdan, xeberdanek bitesîr kir. Di xeberdana xwe de li ser zulm û hîlên siyonîst sekinî. Muslumana gazî hişyarî û ğîretê kir. Di pey re serekê komela Îmkan-Derê Mûrat Ozer peyivî. Da zanîn ku Quds muslumana dike yekwicûd.
Piştî hinek xeberdanê din û tekbîr û sloganan çalakî bi dawî bû.