Çavkaniyekê ji Rûdawê re ragihand ku şeva borî jibilî girtiyekî, hemû endamên din ên Partiya Demokrat ya Kurd li Sûriyê (El-Partî) ku li ba asayişa PYDê girtîbûn, hatin berdan.
Li gorî çavkaniyê, hemû girtiyên El-Partî yên di destê hêzên asayişê yên girêdayî Partiya Yekîtiya Demokrat (PYD) de hatin azadkirin.
Çavkaniyê eşkere kir ku tenê girtiyekî El-Partî yê bi navê Hesen Etê yê ji bajarê Kobanê li cem asayişê girtî maye.
Roja şemiyê, 74 endamên El-Partî ku ji Başûrê Kurdistanê vedigeriyan, hin ji wan li navçeya Xana Serê ya Dêrikê û hin li nêzîk bajarê Qamişlo ji aliyên asayişa PYDê ve hatibûn girtin.
Duh nûnerê PYDê yê Herêma Kurdistanê Cafer Henan ji ji Rûdawê re gotibû, piştî lêpirsînê endamên El Partî dê îro (20.05.2013) yan jî sibê (21.05.2013) bên berdan.
El-Partî jî hişyarî dabû PYDê ku eger tiştek bê serê endamên wan, PYD berpirsiyar e. Rudaw