Hêzên ewlehiyê êrîşî protestovanan kiribûn. Pevçûn û alozî hêj berdewam e. Alozî bû sebebê qirîza siyasî. Di hadîseyan de heta niha zêdetirî 100 kesî can dane. Pevçûn îro jî hebû. 10 polîs hatin kuştin.
Ji ber hadîseyan, serekwezîr Nûrî el Malikî di zehmetiyê de ye. Şîddet û alozî li seranserê welêt belav dibin. Ajansa navnetewî Roytirsê beyan kir ku, li herêma Hawîceyê mîlîtanan 10 polîs kuştine. Berî niha li Hawîceyê 58 protestovan hatibûn kuştin.
Li Ramadiyê zilamên eşîran yên çekdar, ji bo stariya millet, li ser riyan bi şev dest bi nobetan kirin. Alîkarê serekwezîr û parlementerê grûba Iraqiye Salih Mûtlaq, ji bo kuştin û hadîseyên Hawîceyê protesto bike, dev ji wezîfa xwe berda. Do jî wezîrê perwerdehiyê Muhammed Temîm û wezîrê Zanîn û Teknolojiyê Ebdulkerîm Samarrayî, ji bo li Hawîceyê kuştina sivîlan protesto bikin, îstîfa kiribûn. Mehek berê jî wezîrê çandiniyê Îzzeddîn Dewle gotibû ku, wê nebe şirîkê hikûmeteke ku nikare telebên xelkê bi cî bîne û îstîfa kiribû. Ji meha Kanûnê vir ve hejmara wezîrên îstîfa kirine giha 5an (Bangaheq)