Li Erdîşa Wanê, komek esnaf li ber camiya Qara Yûsûf Paşayê, beyanateke medyayî rast kirin. Di beyanatê de hat îfade kirin ku, di projeya veguherîna bajariyê de, bêedaletî tê kirin. Esnaf wiha beyan kir “Ji me dixwazin em mulkên xwe, hîbeyî wan bikin. Tiştên ku teklîfî me dikin, mîna pêkenî pir bêqîmet e.”
Beyanata esnafan ji teref Esat Savci ve hat xwendin. Savci diyar kir ku, ne li ber veguherîna bajariyîyê ne, lê belê di vê projeyê de neheqî tê kirin. Esat Savci wiha xeber da “Ji ber ku proje ne şeffaf û zelal e û li gor qanûnê tevnagerin, em li ber wê ne. Ji me dixwazin ku em mulkên xwe hîbeyî wan bikin. Em rastî zîhniyeteke wiha dibin.”
Esat Savci peyva xwe wiha domand “Li Erdîşê bi xelkê re neşêwirîn û bi mehan berî niha, vê projeyê li Bîlborda xistin. Di vê mehê de, bedelên pir qomîk teklîfî millet kirin. Ji sedî 85 xelk van teklîfan qebûl nakin. Dixwazin bi bedel û teklîfên qomîk, xwe li ser mulkê xelkê deynin.”
Piştî beyanatê esnaf belav bû.