Di daxuyaniya destpêkê ya Walîtiyê de hat ragihandin ku di 14ê Îlona 2025an de, saet di 22:55an de, li ser rêya gundê Eskihamurê gule li wesayîta ku ji hêla M.Ş. ve dihat ajotin hatiye reşandin. Di êrîşê de çar kes, di nav de jina wî T.Ş., keça wî E.Ş. û kurê wî A.Ş., hatine kuştin.

Di daxuyaniyê de hat destnîşankirin ku Dozgeriya Giştî lêpirsînek dadwerî li ser bûyerê daye destpêkirin û hêzên ewlehiyê ji bo ronîkirina bûyerê dest bi xebatê kirine.

Walîtiya Batmanê şeva borî daxuyaniyek duyemîn weşand û derbarê kesên ku êrîşê kirine de agahî parve kir. Walîtiya Batmanê ragihand ku çar kesên ku wekî gumanbarên bûyerê têne hesibandin hatine girtin û hatine binçavkirin.

Di daxuyaniyê de wiha hat gotin: "Yekîneyên me yên ewlehiyê li gorî lêpirsîna dadwerî bi baldarî xebatên xwe didomînin. Raya giştî dê ji her pêşketinekê were agahdarkirin."