Duh (23.11.12) di xwepêşandanên roja înê de cara yekemîn hêjmarek pêşmergeyên rojavayê Kurdistanê li bajarê Qamişloyê tevlî xwepêşandanê bûn û xwepêşanderan bi gotina strana ‘Pêşmergeyên Qamişlo’ pêşwazî li wan kirin.

Endamê Desteya Bilind a Kurd (DBK) û serokê Partiya Yekîtiya Kurd li Sûriyê Îsmaîl Heme di daxuyaniyekê de ji Rûdawê re red kir ku ew pêşmerge girêdayî hêza pêşmergeyên rojavayê Kurdistanê bin û got: “Ew pêşmerge girêdayî ketîbeya Tehsîn Hemo, Mele Mistefa Barzanî, Şêx Meqşûq û hwd... ne û nêzî partiyên rojavayê Kurdistanê ne.”

Hemê di berdewama axaftinên xwe de wiha got: “Ew pêşmerge ji mêj ve li rojavayê Kurdistanê bûn û ne ji Herêma Kurdistanê vegeriyane. Çi dema pêwîst bike, hêza pêşmergeyên rojavayê Kurdistanê wê bi biryara DBKê vegerin rojava.”

Hêza pêşmergeyên rojavayê Kurdistanê ji leşkerên kurd ên ji artêşa Sûriyê çûdabûne pêktê û niha li Herêma Kurdistanê ne.

Hêza pêşmergeyên rojavayê Kurdistanê di bin çavdêriya hêzên pêşmergeyên Herêma Kurdistanê de li Dihokê hatine perwerdekirin û li benda fermana DBKê ne ku vegerin rojavayê Kurdistanê.

Li gor peymana navbera Encûmean Nîştîmanî ya Kurd li Sûriyê (ENKS) û Encûmena Gel a Rojavayê Kurdistanê (EGRK) biryare di demekî nêzîk de serkirdayetiyekî leşkerî ya hevbeş a rojavayê Kurdistanê bê dirûstkirin ku wê hêzên pêşmerge û Yekîneyên Parastina Gel (YPG) bigrin nava xwe.