Li Tilloyê Bûyera Rojê ku her sal di dîrokên 21ê Adarê û 23yê Îlonê de pêk tê, îsal jî bi beşdariya gelek kesî hat şopandin.

Pergala ronahiyê ku Îbrahîm Haqî berî 263 salan wekî nîşaneya dilsoziya xwe ya ji bo mamosteyê xwe Îsmaîl Feqîrullah avakiribû, bi derketina rojê re dîsa erka xwe bi cih anî.

Ronahiya yekem a rojê, bi navgîniya pergalê serê tirba Hespê Îsmaîl Feqîrullah ronî kir. Bûyera Rojê di saet 06.20an de pêk hat û nêzîkî 5 deqeyan dom kir.

Bûyera Rojê ji qada navçeyê hat şopandin

Ji bo Bûyera Rojê li qada navçeya Tilloyê bernameyek hat organîzekirin. Di bernameya ku bi xwendina Quranê dest pê kir de, belgesela ku jiyana Îbrahîm Haqî û çêbûna Bûyera Rojê vedibêje hat nîşandan. Di bernameyê de her wiha îlahî jî hatin xwendin.

Welatiyan, ji ekrana mezin a ku li qadê hatibû danîn Bûyera Rojê bi kelecanî şopandin.

Valiyê Sêrtê û Cîgirê Serokê Şaredariyê Dr. Kemal Kızılkaya di bernameyê de axivî û diyar kir ku Tillo ligel bedewiyên xwe yên xwezayî, bi kûrayiya xwe ya zanistî, manewî û çandî navendeke girîng a çand û şaristaniyê ye.

Kızılkaya diyar kir ku pergala ronahiyê ku Cenabê Îbrahîm Haqî wekî nîşaneya dilsoziya kûr a ji bo mamosteyê xwe Cenabê Îsmaîl Feqîrullah çêkiriye, ne tenê ecêbeke endezyariyê ye, di heman demê de îfadeyeke şênber a rêz, dilsozî û vefayê ye.

Kızılkaya anî ziman ku Bûyera Rojê her sal di 21ê Adarê û 23yê Îlonê de pêk tê û bal kişand ser girîngiya parastin, naskirin û veguhastina vê mîrasa zanist û hikmetê ya ku ji sedsalan berê gihiştiye roja me ya îro ji bo nifşên paşerojê.

Kızılkaya bi bîr xist ku Bûyera Rojê ya Tilloyê di Lîsteya Demkî ya Mîrasa Cîhanê ya UNESCOyê de ye û tomarkir ku ev nîşaneyeke girîng a nirxa gerdûnî ye ku Tillo xwediyê wê ye.

Kızılkaya diyar kir ku bername ji bo gihandina nirxên dîrokî û çandî yên Tilloyê ji girseyên berfirehtir re derfeteke girîng e; di serî de Îbrahîm Haqî, Îsmaîl Feqîrullah û Şêx Mucahîd, hemû mezinên ku di rêya zanist, irfan û dil de li ser van xakan şop hiştine bi rehm û spasiyê bi bîr anîn.

Ji welatiyan re şorbeyek û simid hatin îkramkirin

Tevî Parlamenterê AK Partiyê yê Sêrtê Mervan Gül, Endamê Dadgeha Destûra Bingehîn Kenan Yaşar, Qaymeqamê Tilloyê Tanju Çanakcıoğlu, Rêvebirê Emniyeta Bajar Mehmet Özdemir û Fermandarê Cendermeyan ê Bajar Tûxgeneral Ceylan Yaman; protokola bajar û navçeyê, nûnerên partiyên siyasî û rêxistinên civakî yên sivîl û ji hundir û derveyî bajar gelek welatî beşdarî bernameyê bûn.

Di çarçoveya bernameyê de ji aliyê şaxa Heyva Sor (Kızılay) a Sêrtê ve ji welatiyên ku li qadê li bendê bûn re şorbeyek û simid hatin îkramkirin.

Bernameya Bûyera Rojê bi ziyaretkirina tirba Îsmaîl Feqîrullah û duakirina welatiyan bi dawî bû.