AMÊDÎ / BAŞÛRÊ KURDISTAN - Qeymeqamê qezaya Amêdiyê Îsmaîl Mihemed ji Rûdawê re got: “Di encama befir û barana zêde ya li Herêma Kurdistanê bariyî, duh 30 xêzanên penaber ên parêzgeha Wanê ên li Şêladizê, çadirên wan bi ser wan de ketin û zererên maddî gihan wan. Ji bilî vê yekê 99 xêzanên din jî av di nava çadirên wan de rawestiyabû û zererên maddî gihan wan. Ji ber vê yekê jî ew xêzan li malên komelgeha Şêladizê bi cih bûne.”
150 xêzanên penaber ên bajarê Wanê yên Bakurê Kurdistanê û Rojhilatê Kurdistanê li komelgeya Şêladizê ya girêdaya qezaya Amêdiyê di bin çadiran de dijîn. Ji ber barîna befir û barana zêde, ew xêzan di jiyanekî nexweş de dijîn.
Qeymeqamê qezaya Amêdiyê Îsmaîl Mihemed di dawiya daxuyaniya xwe de got: “Me lijneyek şand wê derê û ji bo zererên wan diyar bikin. Piştre jî rêveberiya Koç û Koçberan a Dihokê ji bûyerê agehdarkirine. Biryare îro 30 çadir, kelûpelên pêwîst û xwarin ji bo wan penaberan bê şandin û li ser penaberan bê parvekirin.” (Rûdaw)