Aktivîstên Fîloya Sumûd a Kurewî (Global Sumud Fleet) yên ku ji aliyê deryavaniya Îsraîla siyonîst ve di avên navneteweyî yên Deryaya Spî de bi awayekî neqanûnî hatibûn girtin, hatin anîn Tirkiyeyê. Ji bo 59 aktivîstên ku 18 ji wan welatiyên Tirkiyeyê ne û ji aliyê çeteya siyonîst Îsraîlê ve hatibûn desteserkirin, duh balafireke taybet a Rêyên Hevayi yên Tirkiyeyê (THY) şandin girava Girîtê.

Balafira ku piştî temambûna karûbarên li giravê, tevî 18 welatiyên Tirkiyeyê; 4 ji DYAyê, 5 ji Arjentînê, 2 ji Awistralyayê, 1 ji Behreynê, 2 ji Brezîlyayê, 6 ji Îngiltereyê, 1 ji Hollandayê, 3 ji Îspanyayê, 2 ji Îtalyayê, 10 ji Malezyayê, 1 ji Meksîkayê, 1 ji Pakistanê, 1 ji Şîliyê û 2 aktivîstên welatiyên Zelanda Nû tê de bûn, di saet 21:45an de li Balafirgeha Stenbolê danî.

Di nav wan de Serokê Şaxa 1emîn a Egîtîm-Bîr-Senê (Sendîkaya Yekîtiya Perwerdekaran) ya Diyarbekirê Ramazan Tekdemîr jî heye, yê ku beşdarî Fîloya Sumûdê bûbû.

Aktivîstên ku bi dirûşmên “Ji çem heta deryayê Filistîna azad” û “Zarokan dikujin” ji balafirê daketin, li Salona VIP ya balafirgehê ji aliyê xizmên xwe û hin rayedaran ve bi kulîlkan hatin pêşwazîkirin. Aktivîstan piştî pêşwazîkirinê daxuyanî dan.

Cîgirê Serokê Giştî yê Memur-Senê Alî Denîz got: “Em di 6ê Nîsanê de ji Îtalyayê tevlî fîloyê bûn. Îsraîlê ya ku li şanê wê tê kir. Em bi dîtina Tirkiyeyê gelekî bextewar in.”

Aktivîst Mihemed Ozdemîr jî diyar kir ku Îsraîl dewleteke terorê ye û ew ê têkoşîna xwe bidomînin. Ozdemîr van îfadeyan bikar anî: “Ez spasiya hevalên xwe yên ku ji aliyê leşkerên Îsraîlê ve hatin dîlkirin lê saniyeyekê jî serê xwe netewandin dikim. Serê xwe ne li ber gefan û ne jî li ber şîdetê tewandin.”

Aktivîst Nevzat Güzel jî van îfadeyan bikar anî: “Me dixwest em bigihîjin Gazzeyê, me soz dabû wan zarokan. Ev fîlm nîvco namîne. Du rojan em di nav avê de razandin. Keştiyek kiribûn girtîgeh; me xwarin nexwar, me rojî girt.”

Aktivîst Mükremin Köse jî bal kişand ser wê yekê ku leşkerên Îsraîlê piştî gulebaranê hilkişiyan ser keştiyê. Köse got: “Em qet netirsiyan. Di destê wan de du çek hebûn lê ji tirsan dilerizîn. Me got em ê di bin lûleyên çekên Îsraîlê de hemû nimêj bikin. Kesên ji neteweyên din ên ku nimêj nedikirin ji me re bûn mertal. Em derketin rêwîtiyeke bi rûmet. Çixtas bextewar in em ku me karî bibe dengê zarok, jin û mirovên li Gazzeyê.”

Piştî merasîma pêşwazîkirinê, aktivîst di çarçoveya lêpirsîna ku ji aliyê Serdozgeriya Komarê ya Stenbolê ve hatibû destpêkirin de, ji bo muayeneyên pêwîst birin Saziya Bijîşkiya Dadî ya Stenbolê. Hat ragihandin ku du welatiyên Tirkiyeyê yên ku ji ber kontrolên tenduristiyê nekarîbûn siwarî balafirê bibin jî, tê hêvîkirin ku îro li Tirkiyeyê bin.