Welatîyên ku li Silopîya Şirnexê karê ajaldarîyê dikin destnîşan kirin dema ku qedexeya zozanan bê rakirin ew ê aborîya baş jê feyde bibîne.

Serokomar Recep Tayyîp Erdogan di daxuyanîya ku da de derbarê qedexeya zozanan a ku ji biharê vir ve ji ber ewlehîyê hatiye îlankirin de destnîşan kir ew ê qedexe bê rakirin. Koçerên ku li beldeya Çalişkana Silopîya Şirnexê karê ajaldarîyê dikin derbarê vê daxuyanîyê de nirxandinan  kirin û destnîşankirin ev qerar dê sûdê bide aborîya welêt.

Hasan Meteyê ku karê heywanan dike derbarê mijarê de diyar kir  digel vê qerarê dê hilberîna şîr zêde bibe û dê bihaya goşt jî kêm bibe û dû re wiha li axavtina xwe zêde kir: “ Weke ku Serokomar got ger qedexe bê rakirin ew ê ajaldarî zêde bibe û dê feydeya wê ji aborîya welêt re jî gelekî zêde bibe.  Me şîr, pênîr, goşt û hingiv li zozanan dihilberand. Berîya vê qedexê 3 hezar, 4 hezar heywanên her malekê hebû. Ew belaya terorê hat û mecbûr man temamê heywanên xwe bifiroşin. Niha di her malî de 50 heywan hene. Elbet ger ev qedexe rabe em dîsa heywanan bistînin û dê heywanên me zêde bibin. Ger zozan vebin em ê heywanên xwe derxînin zozanan û dê di warê hilberînê de zêdebûneke çêbibe. Ew ê feydeya vê yekê li aborîya welêt jî çêbibe.”

Her wisa welatîyê bi navê Îrfan Tîmur û muxtarê taxê Huseyîn Înal jî derbarê rakirina qedexeya zozanan de kêfxweşîyên xwe anîn zimên û diyar kirin ger qedexe bê rakirin ew ê him ji bo wan û him jî aborîya welêt baş bibe.(ÎLKHA)