Li gundê zozanê yê bi ser navçeya Hezexa Şirnexê ve (gundê Zerbîl/Özen)*, dijminatiya (husûmeta) ku di navbera Eşîra Alîkan a li wir dijî û Eşîra Teyan a li gundê Babindakê yê bi ser Silopiyê ve ev gelek sal bûn berdewam dikir, bi hewldanên zana, rûspî û mezinên herêmê bi aşitiyê bi dawî bû.

Di proseya (pêvajoya) ku di bin pêşengiya malbata Şêx Seyda ku ji alimên herêmê ne de pêk hat, bi hewildanên hevpar ên rûspiyê Eşîra Teyan ji gundê Babindakê Mehmet Sarboğa û mezinên din, alî hatin cem hev.

Bernameya ku di bin pêşengiya Şêx Omer Farûq Seyda û muftiyê teqawütbûyî û şêwirmendê berê yê Serokatiya Karên Diyanetê Abdullah Kaplan de hat organîzekirin, derdora zêdetirî 2 hezar kesî ku ji rûspî, alim û welatiyên herêmê pêk dihatin, beşdar bûn. Di bernameyê de piştî xwendina mewlûd û duayan, aliyan destên hev girtin (tewafuq kirin) û dawî li dijminatiya navbera xwe anîn.

Di axaftinên ku di hevdîtina aşitiyê de hatin kirin de, girîngiya yekîtî, bihevrebûn û birayîtiyê derkete pêş. Rûspiyan diyar kir ku ji bo dabînkirina aramiya civakî û parastina hawîrdora aşitiyeke mayînde, gavên bi vî rengî xwedî girîngiyeke mezin in.

Welatiyên ku beşdarî bernameyê bûn jî, tevî duayên hatin kirin, xwestin ku di navbera her du eşîran de hawîrdoreke mayînde ya birayîtiyê ava bibe. Bernameya aşitiyê piştî dayîna xwarin û îkraman bi dawî bû.