Qadayıfê pırpıti yê Diyarbekiri ke werteyê tamanê namdaranê Diyarbekiri de yo, roşanan de cayê xo yê bêvazgêrayışi sevekneno. Ustayan dıyar kerd ke qadayıfê pırpıti yo ke bi cevızın dest pêkerdo, her çend nika fıstıqınê cı revaç de bo zî asılê qadayıfê Diyarbekiri cevızın o. Ustayan tewr zêde zî îkramanê roşani de seba ke tam bêro tewqkerdene, serba qaliteyî nêvengbîyayış dıyar kerd.

Sıraorwer Faik Gözalan ke xisusiyetê qadayıfê pırpıti yê Diyarbekiri, şıkılê weqandışê (muhafaza) cı u fîatanê piyasayî sero tayê dekatan pare kerd; va ke goreyê Roşanê Remezani, Roşanê Qurbani de fırotışê tatliyan de kembîyayış bibo zî nika de tewq nêbîyê u bal ant ser ke waştişi nê 2 rojanê peyênan de zêde bîyo.

"Asılê qadayıfi cevızın o"

Gözalanê ke babetan u eleqeyê wextê roşani yê qadayıfê pırpıti yê Diyarbekiri sero qisey kerd, va ke: "Diyarbekir de qadayıfê pırpıti yo cevızın u pıstıqın yê Diyarbekiri namdar o. Roşan de qadayıf çîyêko winasî yo ke bê cı nêbeno. Çıke keyeyan de ke qadayıf çenêbo, ma jê nê vanî bî roşan. Ma meymananê xo zî pawenî. Nika ma amadeykariya xo kerda. Roşanê verêni de ma dorê 24 tonî fırotış kerd. Nê roşani de aseno ke hîna tayn o. No zî helbet semedê ekonomî ra yo. Çewtê (kîsê) merdiman teng o, fîatî tayê berz ê, aye ra merdimî nêşenî zaf teleb bikerî."

Gözalanî nê çekuyî xebitandî: "Asılê qadayıfê Diyarbekiri cevızın o. Verên de qadayıfê Diyarbekiri de pıstıq çenêbî, nê wextanê peyênan de vejiya. Verên de teyna cevızın estbî. Ke cevızın bo tamê cı bîn o, pıstıqın bo hîna bîn o. Pıstıq hîna paha yo. Kîloya pıstıqıni hazar u hîrê sey u pancas (1350) TL, cevızın zî eyşt sey u pancas (850) TL yo. Waştişî biburî zî, ez bi xo cevızın tercîh keno. Asılê qadayıfi cevızın o."

"Dewe kîloyan top kerdiş ra, yorê kîloyêk bıgê"

Gözalanî viraştışê kadayıfê pırpıti yê Diyarbekiri sero zî qisey kerd u va ke: "Her çend tayê cayan de seba teli makineyan bixebitnî zî, ma bi destanê xo virazenî. Çıke tamê cı hîna bîn o. Yew zî helbet malzemyê cı zaf muhîm o. Cevız u pıstıq de qalite zaf zaf muhîm a. Tayê cayan de fîatanê şenıkan vanî, no zî semedê qaliteya malzeme yo ke tede xebitîyeno ra yo. Şarê ma nê çî zanyeno, peynî de her kes goreyê çewt (kîs) u qewetê xo herêno. Labelê winasî nîyo; dewe kîloyan top kerdiş ra, yorê kîloyêk bıgê ke tamê cı fam bikerî."

Gözalanî qiseykerdışê xo winasî dewam kerd: "Diyarbekir de kadayıf bîyo marka, tescîl gırewto. Aye ra meymanê ke yenî, mitleq yew paket seba dîyariye benî." Gözalanî muhafazakerdışê kadayıfi sero zî va: "Tayê merdimî erzenî dolab u vanî 'şekir gırewt, winasî bî, wşan bî'. Kadayıf, bi şertê ke pîya bi şîraniya xo dolab nêkowê, hetana yew hefte hîç çî pê nêbeno."

"Ma seba Roşanê Qurbani amade yî, pawenî muşteriyanê xo"

Gözalanî seba weşêranê qadayıfê pırpıti yê Diyarbekiri feryad kerd u va ke: "Feryadê mi seba weşêran no yo: Keyeyê xo rê dewe kîloyan top kerdiş ra, kîlo u nîmêk bıgê. Teyna wextê herînayışi de tamê cı zî fam bikerî. Meymanê ke yenî zî wa vacî 'Şıma kadayıf u tatli werd'. Helbet butçe zî muhîm o labelê zaf herînayış rê zî hewce çênêbo. Kîlo u nîmêk bıgê. Şıbê bınê merdîvanan de 350, 400, 500 TL rê herînê, hem keyeyê şıma hem zî meymanê şıma nêrehet benî. Qalite zaf muhîm a. Ma babeta qalite de hîç wext tawîz nêdanî. Tewr zêde zî pıstıq u cevız bo, qaliteya tewr verêne çiyo, ma ey herênenî. Çıke ma fîrmayêk ê, 20 şubeyê ma est ê. No karê yew roje nîyo. Ma wazenî ke muşteriyê ma tim u tim bêrî."

Gözalanî va ke: "Roşanê Remezani de seba tatliyan zaf qerebalix beno labelê Roşanê Qurbani de tayê hîna şenık beno. Nika ma amadeykariya xo kerda u pawenî. Êndî ma zanyenî, Diyarbekir de ke 2-3 rojî mendî waştiş zaf beno. Her kes bazdano; wa tatli bo, wa kinc bo, wa hewcehiyê bînî bî. Aye ra ma nika pawenî."