Projeyê rayirê Diyarbekir u Gêli yo ku serra 2017ıne de ihaleyê cı amebi kerdene labelê serra zaf zaf ver şiy u nêbi temam, beno sebebê reaksiyonê şarê qezay.

Vatandaşê ku vanê ji bo eno rayir teng u tehlukeyin o zaf qezayê trafiki yenê meydan, hem seba ewlehiya ulaştırmay hem zi seba potansiyelê turizmê qezay waşt ku eno rayir hema bêro qedênayene.

Vatandaşê ku vanê wa wedanê xızmetê ku wextê weçinıtışi (seçimi) de ameyê dayene bêrê caardene, talep kerd ku Projeyê Rayirê Diyarbekir-Gêli hewna zaf dıme nêmano, bêro temam kerdene u rayir bêro halêko ewley.

Murat Ağar

"Rayir de her saniye tehlikeyê can u mal u weşiye esto"

Murat Ağaro ku diyar kerd İzmir de cıwiyeno u 32 serri dıme ameyo memleketê xo Gêl, va ku qeza hewceyo xızmet nêvinena u nê halê rayiri qebul nêbeno.

Ağaro ku va ez rayir de rastê zaf qezayanê trafiki ameyo, wına qese kerd: "Ezm İzmir de roşena. 32 serri verê cı naca ra şiyan. Nıka ameyan qezay xo u eno manzara ku mı di mı zaf dıqet kerd u ez zaf zerafet biyan. Qesey kerdışe cı asan niyo. Naca rê zıyaretkari yenê labelê rayir zaf teng o. Wextê ameyene de ez rayir de rastê çend qezayan ameyan. Enê rayiran ra wesaitê gıranê ku mermer bar kerdê zi veyerenê. Ewlehiya canê şarê ma bi awayêko cidî tehlike de ya."

"Kavşako ku ma vanê Eyna Sıpiye (Çarçerr) tede çar rayiri yenê pêser labelê adırê trafiki (trafik ışığı) çniyo. Mı bırrê rojavayi (batı) zaf geriya, ez eza eynî wext de wêniyar (işveren) o. Wextê ku ez ferqê mabênê naca u sûkanê rojavayi vênena, raşti zaf qehiriyena. Qezay rê zaf kêm xızmet yeno. Sûkanê ku ez şiyanê, heta teberê welati (yurt dışında) de zi merdimê ku nameyê Gêli heşnayo estê. Zaf merdimi estê ku wazenê bêrê labelê cayêko ku tede bımânê ya zi nan bowerê çniyo. Eger cayi estebên ku merdimi bışênê 3-5 roji tede bımânê, inan do biameyên naca. Ez zi wazena memleketê xo rê veberhênan (yatırım) bıkera labelê wextê ku ez dormeyê xo ewniyena, xızmetêko bes nêvênena. Selahiyetdaran ra yewna rıcay mı ena ya ku enê rayiri hema bêrê vıraştene." va.

İbrahim Hakkı Uçar

"İhaley benê labelê rayir nêqediyeno"

Vatandaşaran ra İbrahim Hakkı Uçar zi diyar kerd ku seba rayirê Gêli heta nıka 7 finı ihaley ameyo kerdene labelê her rey eno sureç bênetice mendo u wına va: "Seba rayirê Gêli 7 finı ihale bi u her rey zi ame iptal kerdene. Sebebê nê çiyo? Nê rayiri de hema hema yew roje zi çniyo ku tede merg (mewt) nêbo. Merdimi ters ra nêşenê bêrê qezay zırayet bikerê, çıke rayir çniyo. Şirketo ku rayir vıraştı zeft kerd u rayiro serke de caverda, şi. Yeno vatene ku teqriben 80 milyon lira pere ameyo pênêdayene labelê ortane de rayirêko temamgerde çniyo. Qezay de cayêko bes ku merdimi tede bımânê ya zi wesaitê xo park bikerê çniyo. Welatiyê kal u cıni zi seba ku piadeyan (kaldırıman) bixebetnê zaf zor u zehmetiye ancenê."

Zülfü Kılıç

"Çendın finı ihale bi labelê tu neticeyêko nêame gırotış"

Zülfü Kılıç zi diyar kerd ku rayirê teqriben 10 kilometreyi 7-8 serriyo nêqediyeno u va ku çendın finı ihale ameyo kerdene zi tu neticeyêko nêame gırotış.

Kılıçi va ku wextê ameyena merkezê qezay de zaf qezayê trafiki benê u nê qezayan de zaf merdiman canê xo vıraşt u wına qese kerd: "Rayirê qezay ma yo teqriben 10 kilometreyi 7-8 serriyo nêqediyeno. Seba nê rayiri 7 finı ihale bi labelê yew tewr nêbi temam. Qey tu mebusê (milletvekilê) nê memleketi çniyo? Wa êndî nê rayiri rê yew dest berzê. Teyna mehleyanê qezay ma ra merdimê ku wazenê bêrê merkezê qezay, qezayanê trafiki de 20 ra zafêr merdiman canê xo da. Mabênê Piran (Dicle) u Gêli de, o çırap (viraj) de çendın finı wesaiti rayir ra vejiyay u kewti şanbol (uçurum). Weziri ameyi, înan ma rê qewl (soz) da. Va 'Eger ma belediye bıkewnê (bişênê) ma do xızmet bikerin.' Nexwe, koti yo o xızmeto ku ame vatene?"