Serokê Navçeya Surê yê HÜDA PARê Medeni Akgül diyar kir ku 4 sal berê li Çarıklıya navçeya Surê di xebatên lêgerîna jeotermal de ava germ ku pênahiya wê 60 derece ye û di saniyeyê de 25 lître debiya wê heye hatiye dîtin; Akgül daxwaz kir ku ev tesîsa ku bi salan e vala hatiye hiştin têkeve xizmeta gelê herêmê.

Akgül ku li kêleka Sûka Ajalan a Nû ya Çarıklıyê daxuyanî da, destnîşan kir ku li herêma behsa wê hatiye kirin nêzî 4 sal berê bi hevkariya Şaredariya Bajarê Mezin a Diyarbakırê û Rêveberiya Giştî ya Lêkolîn û Gerîna Madenan (MTA) xebata lêgerîna jeotermal hatiye kirin.

Akgül anî ziman ku di encama xebatên sondajê yên ku di ser 2 hezar metreyî re hatine kirin de ava germ ku germaya wê 60 derece ye û di saniyeyê de 25 lître debiya wê heye hatiye dîtin, lê digel vê yekê jî tesîs bi salan e nayê bikaranîn.

"Bi salan e di rewşeke vala de disekine"

Akgül bal kişand ser ku çavkaniya jeotermal zengîniyeke xwezayî ya girîng e û wiha got: "Em niha li kêleka Sûka Ajalan a Nû ya Çarıklıya navçeya Sur a Diyarbakırê ne. Ew qad e ku 4 sal berê bi hevkariya Şaredariya Bajarê Mezin û MTAyê xebata lêgerîna jeotermal lê hatibû kirin. Piştî sondaja di ser 2 hezar metreyî re, ava germ a 60 derece û bi debiya 25 lître di saniyeyê de hat dîtin. Lê belê digel dîtina vê ava germ jî tesîs nêzî 4 sal e di rewşeke bêbandor de disekine."

"Ev xezîneyek e, em binirxînin"

Akgül bala kesên berpirsiyar kişand ser ku divê çavkaniyên xwezayî yên bin erdê bikevin xizmeta gel û wiha got: "Em dixwazin ku ev tesîs zû bi zû bikeve xizmeta welatiyên me yên Palûkê û gelê herêmê. Em daxwaz dikin ku bibe yek ku di malan de bê bikaranîn û tesîseke qaplîcayê ya ku gel jê sûd werbigire bê avakirin. Heyf e; ev xezîneyek e. Em dibêjin vê xezîneyê binirxînin."

"Bajarê me layîqî ya herî xweş e"

Akgül diyar kir ku rêveberiya navendî û ya herêmî derbarê nirxandina vê çavkaniyê de tişta ku dikeve ser milê wan nekirine û anî ziman ku divê zengîniyên xwezayî yên Diyarbekirê vala neyên hiştin.

Akgül got: "Ez xemgîn im, çi rêveberiya navendî çi jî rêveberiyên herêmî tişta ku dikeve ser milê wan nekirin. Em dikarin bibêjin ku ji bilî karên şaredariyê ji ber mijûlbûna bi karên din re wext ji bo vê nedîtin. Lê belê mebesta me tirîxwarin e, ne lêdana rezvan e. Ev bajarê xweş layîqî ya herî xweş e, ev gelê xweş jî layîqî ya herî baş e."

Akgül destnîşan kir ku divê çavkaniyên xwezayî yên bin erdê bi rengekî ku tevkariyê bide jiyana aborî û civakî ya gelê herêmê bên nirxandin û bang kir ku çavkaniya jeotermal a li Palûkê ji nû ve bê rojevê û tesîsên pêwîst di demek nêz de bên çêkirin.