“Serekê Memur-Senî yê Diyarbekirî û aktivistanê Fîloya Sumudî ya Globalî ra Ramazan Tekdemîr, beyanata çapemenî ya ke Ankara de ameye kerdene de va ke, raywanîya ma ya ke bi amancê nêyaya yardîmê însanî yê Gazze û şıkıtena abluka vejîyaybî, bi mıdaxaleyê rejîmê siyonîstî ameye astengkerdene.

Tekdemîrî va: ‘Verî her çîyî, ma reyna welatê xo de bîyî, ma zaf şad bîyî. Heqê xo ra şikir kene ke gıranî û ulvîyetê welatê ma nîşanê ma da. Zerrê ma dejeno; ma fîker kene ke seferê ma nîme mende. Çunke amancê ma resayîşê Gazze û pêvunîyayîşê birayê ma yê Gazze bî. Ma waşt ke abluka û dorpêşîya gırane bışıkê. Ma uca de barê merdımtîye de barkerdî bî. Ma dı heyecan û daxwaza berdene çanteyê mektebî, malzemeyê qırtasîye, mamayê dukan û kayokê domanan de bîyî. Ma nê nêşkîyî bîyarê ca.’”

Tekdemîrî va ke "Ma dejê uca de veradayîşê di birayê xo Tiago û Seyfî ancene" û wina dewam kerd: "Ma birayê xo Tiago yo Brezîlyayî ke 2007 ra nat emrê xo nê fealîyetê sivîlî rê feda kerdo, her tim xebitîyayo ke abluka bışıkno; o ke uca de merdımtî û sîyasat xetimîyabi bi teşebusê sivîlî waşt ke nê veranpîyayan abıkero, waşt ke merdımtî rê bibo nêfes û mizgînî, ma ey pey de verada. O bi raştî zî 'merdimê sey merdiman' bi. Reyna, birayê ma Seyfî yo Filistînî yo Gazzeyî ke bi îdîaya 'ezayê Hamasî yo' sey tehdît ameyêne vênayene, uca de mende û hîkayê nêyî zerrê ma de yo. La ma do helbet dawayê înan bîyarê ca. Ma do dawayê rındekan dewam bikerê."

Tekdemîrî ard ziwan ke her kesî nasnameyê xo pey de veradayî û wina va: "Ma bi nê wesîleyî tede bîyî; ma sey parçeyêka pîştdarîya globalî ya ke tede însanî nasname û meslekanê xo ra ravêrtî, aidîyetê ferdî û komî pey de veradayî, tede bîyî. Ez bi taybetî, hacê xo pey de verada û şîyî uca. Belkî no semedê mi ra yew şaşî bî, belkî yew rîsk bî; la zerrê mi de hîsêko wina virazîya ke şîyayîşê uca hacî ra sererê dît. Çunke ma pêro zaf karê rındî kene. ANFİDAP zî karê zaf rındî keno. STK’yî, Memur-Sen, platformê piştgirîya Filistînî xebatê muhîmî rayebere dane. La ma tayê veranpîyayan (tıkanıklık) vînenê ke ma hîs kene ke nê karî bes nîyê û ma hendê ke lazîm o bitesîr nîyê. Mi no sefer sey rayêka nê veranpîyayan abikero dît û ma bi nê qaydeyî vejîyayî rayer."

Tekdemîrî va: “Ma ke nêzdîyê Gazze bîyî, heyecanê ma bî pîl, cesaretê ma zêde bî û ma hîs kerd ke ma xo dabî yew hemvervejîyayîşê (karşılaşma) pîlî. Çunke Îsraîl, Gazze de bi sîyaseta qetliamî ya ke fîkirê siyonîzmî ra yena weyxerkerdene, gureyê xo rayebere dano. Uca de nêzdîyê sey hezar birayê ma kistî. Nika bi hezaran merdimî nêşkenê xizmetê tibî bigîrê. Bi se hezaran domanî, seba ke yardîmî bi sistemî yenê birnayene, bi vêşanî û nêweşîya kêmweyxerkerdene (yetersiz beslenme) mucadele kene. Verê ma de yew rejîmê terorî esto ke heme dehayê (değer) gerdûnî yê ke merdımtîye bi serran vıraştî, binê lingan de keno û çin keno. No nêşkeno bibo dewlet, do tu wext zî nêbo.”

“Bi raştî ma rê lazîm o ke vajê ‘Dinya Îsraîlî ra pîlêr a’”

Tekdemîrî qıseyê xo wina dewam kerdî: “Ma vînenê ke vera na yapî (yapı) de pênasê (tanımlama) ma bes nîyê. Heq rehmet bikero, Erbakan Hocayo rehmetî serran bi serran nê çîyî qısey kerdî. La zaf merdiman no zêde dît, hetta pê hokenî kerd. Labelê ewro ma ameyî ê nêqtayî ke ma vînenê ey kemî zî vato. No zî nîşan dano ke ma na yapîya verê xo rind nêsnasene. Ma vanê ‘Dinya pancan ra pîlêr a’; belê, ma rê lazîm o ke ma nê vateyî bivurnê yan zî hîra bikerê. Bi raştî ma rê lazîm o ke vajê ‘Dinya Îsraîlî ra pîlêr a’. Çunke yapîyêka wina esta ke sîyaseta dinya kerda îpotek, rehînê xo de tepisena. Yew nîzamê şantajî esto û na yapî bi nê nîzamî serê lingan de manena.”

“Ma vînenê ke ma o veynpîyayîşê (karşılaşma) pîlî yo ke Quran xeber dano, o ke hetta kerrî zî yenê ziwan û tede ca gênê, ey rê bes amade nîyê.”

Tekdemîrî va: “Ma vînenê ke ma o veynpîyayîşê pîlî rê, o ke Quran xeber dano û vano 'heta kerrî zî do bêrê ziwan û nê mucadeleyî de ca bigîrê', ma ey rê bes amade nîyê. Çîyê ma yo zihnî yan zî fîîlî (pratîk) çin o. Ma qala barbarîya Îsraîlî kene; la vera nê de usulê ma yê mucadeleyî çiqas o, perwerde û modelê ma yê amadekerdenê domanan (yetiştirme) senîn o? Na babet de kemasîyê ma yê pîlî estê û ma rê lazîm o ke nê bivurnê. Şart o ke ma yew weçarnayîşê (dönüşüm) zihnîyetî bıkere.”

“Seba ke ma pîvejanê (ölçü) Sumudî bîyarê ca, ma xo sînor kerd”

Tekdemîrî qıseyê xo wina dewam kerdî: “Heq razo bo; ez seba xo vanî, hemwelatîbîyayîşê nê welatî û birabîyayîşê şima ra zaf şad o. Labelê eynî wext de ez yew kemasîya pîle zî hîs kene. Ma wayîrê na dawayê; la ma sey heqê aye wayîrîye kene? Lazîm o ke ma na babet de xo bipersê. Ewro Îsraîl, awanê mîyanneteweyî de korsantî keno, sey dizd û haydutî yeno ma gêno. Eger ma bi o qaydeyo ke zerrê ma ra yeno, goreyê prensîbanê Sumudî yew vindertışo de xurter nîşan bidayêne, ewro ma do çîyê bînî qısey bıkerdêne. Ewro dinya do çîyê bînî bivatêne. Ortam hende munasîb bî ke; yapîyêka hende tirsok, hende barbar û hende bêmerhamet û pısırîk verê ma de bî… Labelê ma semedê maslahatî (uygunluk) xo tepisand, ma xo sînor kerd. Zerrê ma de ma zaf êşîyayî.

Ma maslahat fîker kerd û uca de goreyê miletê ma yê Tirkîya, STKyan û partîyanê ma yê ke bi zerrî na dawa rê karkene, reaksîyonêko kêmî nîşan da. Çunke ma waşt ke pîvejanê Sumudî bîyarê ca, ma xo frena kerd. Labelê verê ma de yapîyêka barbar esta. Şertanê bêmérdımtîye de ma tepisandî, ma dîl gırotî. Çîyê ke ameyî sereyê embazanê ma, aya ke asena tenê pencerêka qije ya seba fêmkerdena dejê Gazze. Ê dejê ke kadraj de nîasê, îşkenceyê ke domanan rê benê û o nîzamê zulmî yo ke însanî her çî ra mehrûm keno, ma uca de nê çîyî nêzdî ra dîtî. Ma nê nêqtayî de waşt ke ma xo bi xo de rıst bıbê (yüzleşme) û muhasebe bıkerê.”

“Dinya de yew bêvengî û bêhesîye esta”

Tekdemîrî va: “Ma mecbur ê ke vera Îsraîlî de bibê parçeyê mucadeleyêko hîna pîlî û ma gere xo seba vînayîşêko (karşılaşma) pîl amade bikerê. O roj do bêro. Labelê, o rojî gere Îsraîl nîyaro; gere ma o rojî bîyarê. Gere ma na de'wa bi nê çimî ra biewnê. Dinya de yew bêvengî û bêhesîye (kayıtsızlık) esta. Na bêvengî û bêhesîye ke zêde biba, dejê birayê ma yê Gazze zî hîna pîl beno, felaket xori beno û krîz hîna giran beno.

Ma vera nê de bawer kene ke teşebusê sivîlî zaf muhîm ê. Cayê ke sîyasat xetimîyeno, cayê ke dewletî polîtîkayê denge kene verê xo, nê tewir teşebusî rolêko muhîm kay kene. Wexto ke ma tede ca gênê, ma vînenê ke yardîmî resenê uca, pîştdarî zêde bîya û birayê ma yê uca hîna zaf yenê wayîrveziyayîş. Gere ma nê xebatan zêde bikerê û tu wext nê teşebusanê sivîlan ra fek vernêdadê.”

“7 ra heta 70î miletê ma, dezgehê ma yê sivilî, komeleyî û partîyê ma ke wayîr vejîyayî, no zaf erjayî (kıymetli) yo”

Tekdemîrî qıseyê xo wina qedîna: “Wexto ke ma agêrayî Tirkîya, ma sipasîya Birêz Serekkomarê xo, Wezîrîya Karê Teberî û balyozê xo kene. Ma yew dewleta wina dît ke serê sibayî ra nat bi her hemwelatîyî reyde yew bi yew eleqedar bîye, teyare şand û nê surecî rind îdare kerd. Na babet de vindertışê dewleta ma erjayî yo. 7 ra heta 70î miletê ma, dezgehê ma yê sivilî (STK), komeleyî û partîyê ma ke wayîrê na dawa vejîyayî, no zaf bî qîymetdar. Labelê ma xo tenê sey eyneyêk (mîreke) vînenê. O ke nê çîyan ciwîyeno ma nîyê, Gazze yo. Eger ma bışîyê dejê înan bımocnê û bibê eyne, no seba ma bes o.

Gazze de nêzdîyê 10 hezar hepisî estê; nînan ra 350 doman îdamî reyde rü bi rü yê. 90 cinîyî binê tehdîtê îdamî de yê. Uca de her tewir îşkence, zulm û dej esto. Na rayer ra gere ma hîna zaf çîyan bikerê. Gere ma xebatanê xo zêde bikerê û welatê ma nê mucadeleyî de hîna aktîf bo. Rebbê mi Gazze rê ferahî û xelaskarî nîsip bıkero. Şehîdanê ma rê rehmet bıkero. Mucadeleyê uca bi înayetê xo bıkero serfîrazî. Ma zî bıkero parçeyê na serkewtışî. Homay şima pêro ra razî bo.”

Dima ra, aktivistanê Fîloya Sumudî ya Globalî ra Temsîlkarê Memur-Senî yê Ankara Nevzat Öylekî, o ke rastê hêrîşê siyonîstan ameybi, ey zî yew qısey kerd.